Cumprindo co anunciado polo Concelleiro de Desenvolvemento Sostible e Persoal, Daniel Piñeiro, este martes asinouse o decreto de nomeamento e mañá tomarán posesión dous técnicos en acumulación de tarefas que reforzarán o servizo municipal de Arquitectura para axilizar as licenzas de obra maior, pois as menores e de actividade estanse a conceder en prazo. Deste xeito, serán 9 arquitectos no departamento.

A incorporación de dous arquitectos, dedicados en exclusiva a tramitar licenzas atrasadas, foi unha das decisións avanzadas por Piñeiro a representantes dos colexios profesionais de arquitectos, aparelladores e enxeñeiros para gañar axilidade e eficacia na tramitación dos expedientes das licenzas.

As outras medidas adoptadas pasan por continuar dando prioridade aos proxectos con subvención (instalación de ascensores e caldeiras, entre outros) e aos de edificios con medidas de eficiencia enerxética e sostibilidade ambiental; a aplicación do decreto autonómico 144/2016 que aproba o regulamento único de regulación integrada de actividades económicas e apertura de establecementos, que permite a axilización dos proxectos de actividade e de obras e actividade que conten coa certificación dunha ECCOM (Entidade de Certificación de Conformidade Municipal); así como a reducción do horario de consultas ofrecido polos técnicos do servizo municipal de Arquitectura, pasando de atender tres días a un, en horario de 11:00 a 14.30h, para que poidan utilizar o máximo tempo posible a supervisar proxectos. Tamén se encomendarán á empresa pública EVISLUSA máis traballos urbanísticos, para liberar aos técnicos do Concello destes traballos e que poidan ocuparse de licenzas.

Así mesmo, o Concelleiro e os colexios profesionais acordaron establecer pautas para estructurar a documentación do proxecto de obra de maneira máis operativa, de xeito que os documentos principais e imprescindibles que deben supervisar os técnicos estean ao principio, ademais de definir cuestións como a inclusión no expediente de planos catastrais da parcela, a superposición do proxecto no plano do Plan Xeral de Ordenación Municipal (PXOM) ou a xustificación da edificabilidade da parcela e o proxecto, e a súa volumetría.