O goberno de Lara Méndez, dende a área de Benestar, Inclusión e Terceira Idade, que dirixe Olga López Racamonde, aposta por levar aos maiores de Lugo ás prazas e parques da cidade para que as actividades de ocio e saúde activa sexan máis seguras ao desenvolverse ao aire libre.

Con este fin, pon en marcha a iniciativa ‘Lugo móvese cos maiores’ dentro do programa municipal de animación sociocultural, onde se desenvolverán actividades pensadas para atender a súas demandas e necesidades, tanto físicas como emocionais.

“É importante que as persoas de máis idades desenvolvan actividades físicas e combatan o sedentarismo e a soidade, ao mesmo tempo que poidan socializar, e que o fagan en contornas seguras, porque son moitas as que levan meses con medo a saír das casas, e iso lles afecta tanto na súa saúde física como mental”, sostén a concelleira. Ademais, engade, “animalos a realizar exercicio físico permitirá que teñan o corpo e a mente ocupados e así evadirse un pouco desta realidade de pandemia que nos afecta a todos”.

Neste senso, a área de Benestar, que intensificou desde o primeiro estado de alarma o contacto directo cos maiores de 65 anos a través do persoal dinamizador dos centros cívicos, pon agora a súa disposición este programa, previo análise das necesidades e demandas deste colectivo, que comezará o vindeiro luns, día 5 de abril, ata o 31 de maio. Desenvolverase de luns a xoves, das 17.00 ás 18.00 horas.

A edil explica que “se trata de rutas guiadas e actividades de ximnasia na prazas e parques da nosa cidade, en pequenos grupos e sempre guiadas por polos monitores do servizo de animación”.

As actividades (ximnasia, aerobic, movementos de relaxación...) impartiranse os luns e mércores nas seguintes ubicacións:

• Praza das Illas (Montirón)
• Praza da Milagrosa
• Praza do Exército Español (Fonte dos Ranchos)
• Praciña da Igrexa (Sagrado Corazón)
• Praza Roxa (Fingoi)

E os martes e xoves:

• Praza Maior (Centro)
• Horta do Seminario (Avda. Ramón Ferreiro)
• Praza do Castiñeiro (Lamas de Prado)
• Praza de Viana do Castelo (Piringalla)
• Augas Férreas (Próxima á zona universitaria)

Tamén programáronse 4 rutas guiadas pola cidade, que se desenvolverán todos os venres cada 15 días, todas con saída desde a Praza Maior e sempre baixo as restricións sanitarias en vigor en cada momento. A duración de cada unha delas será dunha hora e media:

• 16 abril: Lugo + Domus do Mitreo (ás 12.00 horas)
• 30 abril: Lugo + Porta Miñá (ás 12.00 horas e 12.30 horas). 13 grupos
• 14 maio: Lugo + Museo Interactivo da Historia de Lugo (MIHL) (ás 12.00 horas)
• 28 maio: Vello Cárcere