O Servizo Municipal de Prevención de Drogodependencias presenta esta tarde ao público o programa San Ocio, unha nova campaña coa que se pretende loitar contra a drogoddicción mediante o uso do deporte e do ocio en xeral. A presentación está a cargo dun pasarrúas que contará con zancudos, música e actuacións na rúa. Sairán ás cinco da tarde do Centro Social Uxío Novoneyra e teñen previsto chegar á praza Maior sobre as cinco e cuarto.

A actividade de “San Ocio” está programada para desenvolverse en catro puntos da cidade, específicamente nas zonas da Piringalla (IES Pirinagalla), en Lamas de Prado (IES Leiras Pulpeiro), no Sagrado Corazón (CEIP Sagrado Corazón) e na zona de San Lázaro (CEIP A Ponte). Os centros educativos facilitarán para o proxecto as súas instalacións deportivas para as actividades de interior pero se considera que a súa execución e desenvolvemento pode realizarse tamén no exterior se o tempo o permite. O horario será de catro e media a sete e media da tarde catro sábados seguidos, agás na Ponte, onde será pola mañá. Terá lugar nas instalacións deportivas dos centros educativos citados.

Este proxecto foi elaborado íntegramente polo Servizo Municipal de Prevención de Drogodependencias, adscrito á Concellería de Muller e Servizos Sociais, con cargo aos fondos pertencentes aos Bens Decomisados do Ministerio de Sanidade de Consumo, da Delegación do Goberno do Plan Nacional sobre Drogas.

As actividades deste programa de tipo lúdico e deportivo estarán centradas no predeporte, máis concretamente nunha serie de dinámicas para os barrios en base a circuítos de xogos e utilizando material de deporte alternativo, sen descartar os xogos clásicos, neste intento tratarase o fomento e a participación tamén do xénero feminino.

O programa desenvolverase todos os sábados de abril, maio e xuño, terminando coa clausura, torneos, exhibicións e entrega de agasallos. As actividades están coordinadas polos profesionais da Asociación “Deporte y Vida-Asociación de Deportistas”, que se encargarán da coordinación xeral e da contratación de monitores para esas actividades. Haberá dous monitores en cada unha das catro zonas durante as tres horas que dura a actividade.