A Tenencia de Alcaldía, a través da Concellería de Educación e Difusión do Coñecemento, retoma un ano máis as actividades de hortos escolares nos centros de ensino públicos para as e os estudantes de sexto de infantil. Rubén Arroxo e Iria Buide visitaron o colexio Luís Pimentel, onde hoxe comezou a actividade neste curso.

Iria Buide, concelleira de Educación e Difusión do Coñecemento, explicou que “estas actividades utilizan o traballo no horto como recurso educativo, para tratar todo o que ten que ver co medio natural, o seu coidado e a concienciación ambiental”. Ao mesmo tempo, as actividades pretenden ser unha ferramenta para espallar as tradicións galegas relacionadas cos ciclos do ano.

O horto, xunto coa aprendizaxe de cantigas, xogos e celebracións tradicionais relacionadas cos ciclos do ano, é unha experiencia na que se pode participar en calquera etapa da vida, pero é, sen dúbida, nas primeiras etapas educativas onde a estimulación dos sentidos é máis importante. Por iso, esta actividade supón un recurso educativo de grande interese para que nenos e nenas de curta idade vivan, experimenten e gocen do traballo no contorno natural, intervindo nel dun xeito consciente e responsable e desfrutando ao mesmo tempo da música, das cantigas, das celebracións e dos xogos tradicionais relacionados con estes traballos.

As nenas e nenos participantes poderán desenvolver a súa capacidade de observación e investigación no contorno, e coñecerán e utilizarán ferramentas diferentes ás de uso cotián. Ao mesmo tempo, achegaráselles o coñecemento de músicas, cantigas, celebracións e tradicións relacionadas co ciclo do ano e coa natureza.

Neste curso as actividades comezaron hoxe, 9 de marzo, con tres grupos do CEIP Luís Pimentel. Ao longo do programa impartiranse 7 sesións en 22 grupos de 6º de Infantil, e no verán realizaranse tamén 4 sesións nas dúas escolas infantís de xestión directa do Concello, a EIM Gregorio Sanz e a EIM Serra de Outes.

Audio

• A concelleira de Educación e Difusión do Coñecemento, Iria Buide, sobre os Hortos Escolares | Descargar mp3