O tenente de Alcalde afirmou que "seguimos traballando para que a xente cada vez máis o bus urbano, un medio de transporte máis cómodo que o vehículo privado".
Este novembro supón o mellor novembro da historia, superando en 13.573 billetes ao 2023, o segundo mellor rexistro "nun 2025 que está chamado a superar de novo o récord histórico anual".
Rubén Arroxo, tenente de Alcalde do Concello de Lugo e concelleiro responsábel do transporte público, deu conta dos datos de usuarios no Bus Urbano no mes de novembro do 2025, uns datos que novamente superan a mellor marca rexistrada desde que o Concello de Lugo garda rexistro de usuarios "e nos que por primeira vez nun mes de novembro superamos a marca de 200.000 usuarios". Novembro de 2025 pechou cun total de 207.070 billetes expedidos, superando en 13.573 billetes a mellor marca histórica, a rexistrada no mesmo período do ano 2023.
Con estes novos datos, o bus urbano continúa a demostrar que é xa "o medio de transporte principal da maior parte da veciñanza de Lugo", dixo Rubén Arroxo, que engadiu "tras a recuperación da pandemia e a adaptación da veciñanza a un modelo de liñas que conectan a preto do 90% das persoas de Lugo, o bus está a demostrar que é a mellor maneira de moverse por Lugo".
Arroxo afirmou que os datos de usuarios no 2025, á espera do que aconteza en Decembro, "superarán a marca anual de 2024", e explicou que a áera de de mobilidade continúa a traballar na promoción do bus urbano entre a veciñanza como "un transporte económico que facilita as viaxes, ao non ter que preocuparse de buscar espazo para aparcar". Neste ano, os meses de maio, xuño, setembro, outubro e novembro superaron a barreira dos 200.000 billetes expedidos, e todos os meses do ano agás maio superaron a marca de 2024.
Lugo conta co bus urbano máis barato de Galiza e o terceiro máis barato do estado, cun prezo de 0,64€ o billete ordinario (0,45€ usando a tarxeta cidadá), e 0,31€ no caso do transporte bonificado para as persoas con mobilidade reducida, pensionistas, desempregadas ou estudantes. Ademais, todas as persoas que utilizan a Tarxeta Cidadá gozan de transbordos gratuítos para os seus desprazamentos.
Para obter a tarxeta cidadá, deberá cubrirse o formulario que se pode atopar na web do Concello, ou recollelo nas oficinas municipais do seminario, e pagar a taxa de 3,09€ nunha oficina de Abanca. Despois, deberá pedirse cita no 010 para retirar a tarxeta nas oficinas do Concello. A recarga do moedeiro será, como mínimo de 5€, cun máximo de 60€.
Audio
- Rubén Arroxo, tenente de Alcalde do Concello de Lugo, sobre o bus urbano en novembro | Descargar mp3