O Concello de Lugo continúa avanzando no reforzo da súa estrutura administrativa e na consolidación do emprego público municipal. No último mes impulsáronse 27 prazas de emprego público entre novas convocatorias, procesos en marcha e nomeamentos efectivos, nunha estratexia destinada a reducir a temporalidade e fortalecer os servizos municipais.

Na Xunta de Goberno Local celebrada este mércores aprobáronse 9 novas prazas correspondentes á Oferta de Emprego Público de 2025, así como diversas medidas organizativas en materia de persoal.

A concelleira da Área de Xestión Integral de Recursos Internos, Ana González Abelleira, destacou que estas actuacións responden a unha planificación sostida en materia de recursos humanos.

“Estamos executando as ofertas de emprego público con planificación e ritmo, reducindo a temporalidade estrutural e consolidando equipos técnicos estables”, sinalou a edil, quen subliñou que reforzar o persoal municipal “é clave para garantir unha administración máis sólida e uns servizos públicos de maior calidade para a cidadanía”.

Na sesión desta semana a Xunta de Goberno Local aprobou as bases específicas de 9 prazas incluídas na Oferta de Emprego Público de 2025, destinadas a reforzar diferentes áreas municipais.

Entre elas figura unha praza de arquitecto/a, que permitirá fortalecer a área de urbanismo e planificación técnica da cidade.

No ámbito social aprobáronse unha praza de educador/a social e dúas prazas de traballador/a social, destinadas a consolidar os equipos municipais que traballan na atención a familias, menores e persoas en situación de vulnerabilidade.

Tamén se aprobaron dúas prazas de técnico/a de administración xeral en quenda libre e unha praza adicional mediante promoción interna, reforzando a capacidade xurídica e administrativa da institución e favorecendo ao mesmo tempo a carreira profesional do persoal municipal.

Finalmente, incluíronse dúas prazas de analista programador/a, fundamentais para avanzar no proceso de modernización tecnolóxica do Concello e no desenvolvemento da administración electrónica.

A Xunta de Goberno Local aprobou tamén as bases para a creación dunha bolsa de traballo de técnico especialista en estratexias urbanas financiadas con fondos FEDER.

A persoa seleccionada integrarase na unidade de xestión do PAI “Novo Norte” e asumirá funcións vinculadas á supervisión da contratación pública asociada a financiamento europeo, ao control financeiro e á correcta xustificación dos fondos ante as administracións nacionais e comunitarias.

Esta medida permitirá reforzar a capacidade técnica municipal na xestión de proxectos financiados con fondos europeos e garantir o cumprimento da normativa comunitaria en materia de control e prevención da fraude.

No ámbito da organización do persoal, a Xunta de Goberno Local autorizou tamén a permuta de destinos entre un funcionario da Policía Local de Lugo e outro do Concello da Coruña.

Trátase dunha medida que non supón incremento de gasto nin alteración da estrutura do cadro de persoal, pero que permite facilitar a conciliación profesional dos axentes mantendo ao mesmo tempo a cobertura efectiva das prazas.

Reforzo da Xefatura do servizo de Bombeiros

A Xunta de Goberno Local aprobou ademais a atribución temporal das funcións de Sarxento-Xefe do Servizo de Prevención, Extinción de Incendios e Salvamento (SPEIS) ao funcionario municipal Juan González Coto.

Esta medida permitirá garantir a dirección operativa do servizo mentres se desenvolve o proceso de reorganización da súa estrutura interna e durante a situación de incapacidade temporal do actual titular da xefatura.

O servizo municipal de bombeiros conta actualmente cunha estrutura formada por un posto de Sarxento-Xefe, cinco cabos e cincuenta bombeiros-condutores, na que nos últimos anos se detectou unha carencia de mandos intermedios que concentra boa parte das funcións de dirección nun único posto.

Segundo explicou Ana González Abelleira, esta decisión permite asegurar o funcionamento ordinario dun servizo esencial para a cidade mentres o Concello avanza no proceso de revisión e reforzo da súa estrutura organizativa.

27 prazas de emprego público impulsadas nun mes

Ademais das medidas aprobadas nesta sesión, o Concello de Lugo impulsou nas últimas semanas diferentes actuacións destinadas a reforzar a estrutura municipal e avanzar na execución das Ofertas de Emprego Público.

Durante o último mes aprobáronse 16 prazas correspondentes á Oferta de Emprego Público de 2025, ás que se engaden 9 prazas da Oferta de Emprego Público de 2023 nas que se activaron procesos selectivos mediante a designación dos correspondentes tribunais cualificadores.

A estas actuacións súmanse tamén dous nomeamentos efectivos de funcionarios de carreira como celadores de colexio público, que supuxeron a culminación de procesos selectivos iniciados en convocatorias anteriores.

Ademais, neste período adoptáronse outras medidas organizativas en materia de persoal, como permutas entre axentes da Policía Local ou a creación de bolsas de traballo especializadas, destinadas a reforzar áreas técnicas da Administración municipal.

Outros asuntos tratados

A Xunta de Goberno Local aprobou tamén a prórroga da concesión do uso privativo do Campo Municipal de Fútbol “José Carballido Cerceda” a favor do Club Deportivo Lugo, S.A.D., ampliando o prazo ata o 13 de xaneiro de 2036.

Na mesma sesión aprobouse o convenio coa Xunta de Galicia para a cesión ao Concello do aparcadoiro disuasorio da Avenida de Breogán, unha infraestrutura con 148 prazas financiada con fondos europeos NextGenerationEU e destinada a favorecer a mobilidade urbana sostible.