A Alcaldesa de Lugo, Lara Méndez, participou este venres no Salón de Actos da Deputación de Lugo na apertura das XX Xornadas da Sección de Psicoloxía e Saúde, organizadas polo Colexio Oficial de Psicoloxía de Galicia (COPG) coa colaboración do Concello. Ao acto tamén asistiron o deputado de Promoción Económica e Social, Álvaro Santos, a presidenta do comité organizador destas xornadas, Delia Guitián e o vogal do COPG, Víctor Torrado.

No acto, a rexedora fixo fincapé en que cada vez con maior asiduidade a nosa cidade é sede de todo tipo de encontros. “Lugo avanza, e ademais de ser unha cidade cun gran patrimonio cultural, histórico, medioambiental e gastronómico, quere tamén ser cuna de pensamento”, asegurou Méndez, quen convidou aos participantes a gozar da cidade luguesa durante os 3 días que duran as xornadas.

As XX Xornadas da Sección de Psicoloxía e Saúde, que reúne en Lugo a máis de 100 profesionais de toda Galicia, buscan fomentar o intercambio de coñecementos e a experiencia clínica respecto á conceptualización da personalidade e da identidade no actual contexto social, así como o seu manexo dende a psicoterapia.