A alcaldesa de Lugo, Elena Candia, recibiu hoxe na Casa do Concello ao cónsul xeral da República Oriental do Uruguai en Galicia, Pedro Keuroglian Gómez, nun encontro institucional orientado a reforzar os vínculos entre Lugo e a representación diplomática uruguaia e a abrir novas posibilidades de colaboración.

Keuroglian Gómez asumiu o cargo o pasado 1 de xullo, en substitución de Ramiro Rodríguez Bausero, e exerce a representación consular de Uruguai para Galicia, Asturias, Cantabria e País Vasco. A sede do Consulado Xeral atópase en Santiago de Compostela.

Durante a recepción, Candia puxo en valor os fortes vínculos humanos, históricos e culturais que unen Galicia e Uruguai, marcados especialmente pola emigración galega e polos lazos familiares construídos durante xeracións entre ambos territorios.

A alcaldesa destacou tamén a importancia de manter unha relación fluída co Consulado para achegar Lugo á comunidade uruguaia e favorecer novas oportunidades de colaboración nos ámbitos institucional, cultural, social e económico.

“Galicia e Uruguai comparten unha historia construída sobre todo a través das persoas. Queremos que Lugo siga fortalecendo eses vínculos e abrir novas vías de relación que nos permitan compartir experiencias, impulsar iniciativas conxuntas e estar máis preto da comunidade uruguaia”, sinalou Elena Candia.

O encontro permitiu igualmente presentar as respectivas liñas de traballo e establecer un primeiro contacto para identificar ámbitos nos que Concello e Consulado poidan desenvolver futuras iniciativas.

Pedro Keuroglian Gómez é diplomático de carreira. Antes de asumir o seu novo destino exerceu como director de Relacións Institucionais do Ministerio de Relacións Exteriores de Uruguai. Ao longo da súa carreira desempeñou responsabilidades diplomáticas en Canadá, Francia, Ecuador e India, entre outros destinos. A súa traxectoria inclúe experiencia en materia de relacións económicas internacionais, comercio exterior e cooperación diplomática.

A recepción dá continuidade á liña de traballo impulsada polo Concello para reforzar as relacións institucionais de Lugo e ampliar a súa proxección exterior mediante contactos que poidan traducirse en novas oportunidades para a cidade.