“O 21 de outubro de 1936 foi un dos días nos que se escribiu unha das páxinas máis negras da historia da cidade de Lugo co fusilamento, practicamente a esta mesma hora, do doutor Rafael de Vega Barrera. 86 anos despois, e lembrando aquela terrible inxustiza, podemos congratularnos de que esta data sexa sinónimo tamén, a partir de agora, da recuperación de parte da dignidade que a Ditadura lle quixo negar a tantas persoas e ás súas familias”.

Con estas verbas, a alcaldesa de Lugo, Lara Méndez, daba comezo esta tarde á homenaxe coa que o Concello de Lugo quixo enxalzar a figura de Rafael de Vega, na conmemoración do 86 aniversario da súa morte. Un acto, presidido pola rexedora e ao que tamén asistiron, alén doutros membros da Corporación Municipal, o escritor lucense Paco Martín e os familiares do homenaxeado, entre eles, o seu neto Rafael Pérez de Vega.

“Un home xusto e bondadoso – referiu a alcaldesa – que deixa un importante legado na nosa cidade, como modernizador da sanidade lucense. O médico dos pobres, como así se lle coñecía por atender, con xenerosidade, de forma altruísta, aos seus conveciños. De Vega Barrera foi un dos impulsores e o primeiro director do Hospital de Santa María, obra doutro insigne veciño (Ángel López Pérez), pero tamén a el lle debemos, entre outras moitas cousas, o concepto de vivenda para familias numerosas – os famosos Chalés de Vega - que comezou a agromar na capital cando as edificacións sobrepasaron o ámbito da Muralla”, sinalou a rexedora.

Durante o evento, no que se procedeu a descubrir unha placa conmemorativa que complementa á xa existente no busto do doutor e que revela, mediante un código QR a información máis relevante da súa biografía, Lara Méndez aplaudiu que o pasado 5 de outubro o Senado tivera aprobado, de forma definitiva, a lei de Memoria Democrática, “unha norma, fundamentada nos principios de verdade e xustiza, que reivindica expresamente a transición e os valores democráticos e que condena, por primeira vez, o golpe militar de xullo de 1936 e a Ditadura franquista”.

Esta lei - apoiada por todos os grupos parlamentarios agás PP, VOX, Cs e UPN - declara o 31 de outubro como Día de recordo e homenaxe a todas as vítimas do golpe militar, a Guerra Civil e a Ditadura que “con tanto medo sementaron a inxustiza por toda a xeografía co tráxico resultado de milleiros de exiliados e represaliados, centos de miles de homes e mulleres asasinados, entre eles o  Dr. Rafael de Vega. Por iso hoxe, alén de lembrar e poñer en valor a súa figura podemos dicir con verdadeira satisfacción que estamos a escasos días de poder celebrar, por primeira vez, unha conmemoración oficial que nos permite rememorar a loita polas liberdades e dereitos que chegaron da man da II República”, subliñou Méndez.

Neste sentido, a rexedora sinalou que a Lei de Memoria Democrática “suporá un verdadeiro alivio para as persoas afectadas, conseguindo iniciar un novo camiño en España, ao mesmo nivel  que outras democracias europeas e axustando, así, ao noso país aos principios de dereito internacional”, recoñeceu.

Antes de rematar, Lara Méndez fixo un chamamento “para non deixar caer no esquecemento ás vítimas da Ditadura, manténdoas vivas na lembranza e na nosa historia colectiva”, engadiu.

Durante o encontro houbo tamén momento para recordar ao Gobernador Civil D. Ramón García Núñez, ao practicante Perfecto Abelairas Castro, ao industrial Ángel Pérez López e ao mestre José Ramos López que, “igual que De Vega Barrera foron asasinados tamén este mesmo 21 de outubro ás seis da tarde”, finalizaba Méndez.

A continuación do acto, o escritor asturiano José Francisco Rodil, presentou no Vello Cárcere a novela ‘Sentencia’ que relata o complot urdido en contra de Rafael de Vega para propiciar o seu axustizamento.

Sentencia:

O doutor Rafael de Vega Barreira non é tan coñecido na terra na que naceu, en Zazuar, como en Galicia, exercendo a súa profesión de cirurxián en Lugo. Volve ser o personaxe elixido polo escritor asturiano José Francisco Rodil.

Ao comezo da Guerra Civil, os golpistas encarcerárono e someteron a un xuízo sumarísimo. O fiscal pediu para él a pena de morte e a defensa, a súa libre absolución. A obra penétrase nesta historia e nesta sentenza que non deixou a ninguén indiferente.