A tenente de alcaldesa e concelleira de Desenvolvemento Local e Emprego, Ana Abelleira, participou este xoves na cerimonia de entrega dos Premios Nacionais de Comercio Interior 2022, que recoñeceron o especial labor e apoio do Goberno de Lara Méndez ao sector comercial lucense, outorgando ao Concello de Lugo o único accésit que se concedeu nesta convocatoria a muncipios de España.

O Concello obtivo este recoñecemento por parte do Ministerio de Industria, Comercio e Turismo, a través da Secretaría de Estado de Comercio, organizadora do certame, na categoría de municipios de máis de 25.000 habitantes, na que Zaragoza, foi o primeiro premiado.

O acto de entrega de premios tivo lugar esta mañá no Parque Zelai Arizti, en Zumárraga (Gipuzkoa), e estivo presidido pola ministra, Reyes Maroto, e contou coa participación da Secretaria de Estado de Comercio, Xiana Méndez, ademais doutras autoridades do País Vasco, como o alcalde de Zumárraga, Mikel Serrano; ou o Delegado do Goberno nesta comunidade, Denis Itxaso; así como representantes dos Concellos e asociacións galardonadas.