O contrato, que se comeza a executar de forma inmediata e terá unha duración de catro anos, abarca máis de 80 edificios e supón un salto cualitativo en persoal e maquinaria.
Inclúese un incremento do 17% no cadro de persoal, a modernización de todos os recursos materiais e un aumento do 34% nas horas de servizo.
O edil en funcións de Transición Ecolóxica, Mauricio Repetto, destacou que “a posta en marcha deste servizo con carácter inmediato demostra o noso compromiso por garantir unhas instalacións municipais en condicións óptimas desde o primeiro día.”
- Tema
O Concello de Lugo vén de activar o novo contrato de limpeza de edificios municipais e centros educativos públicos, adxudicado á empresa Lacera Servicios y Mantenimiento. Cun investimento total de 10.798.092,01 euros durante os próximos catro anos, este contrato representa unha modernización sen precedentes nas tarefas de limpeza das máis de 80 dependencias municipais incluídas no servizo.
Entre as melloras principais atópanse a renovación integral da maquinaria, o incremento dun 17% no cadro de persoal e un aumento do 34% no número de horas destinadas ao servizo. Ademais, inclúense novas dotacións como o Edificio Impulso Verde, o Auditorio Fuxan os Ventos ou o Coliving artístico, que serán atendidas por un servizo máis eficiente e sostible.
En total, este contrato abrangue máis de 80 inmobles municipais, incluíndo novas dotacións como o Coliving artístico, o Edificio Impulso Verde, o Auditorio Fuxan os Ventos, o Centro de Benestar Poeta Aquilino Iglesias e a Cloaca Romana. Tamén se renovará o servizo en todos os centros educativos públicos, garderías e o Parque Infantil de Tráfico. As dotacións de servizos sociais, como o Centro de Día Antonio Gandoy, Evislusa ou as casas sociais Clara Campoamor e María Mariño, contarán con atención específica, ao igual que instalacións culturais como a Casa da Xuventude, o Vello Cárcere e o Centro de Convivencia Paco Martín. As infraestruturas deportivas, entre as que destacan pavillóns, campos de fútbol, pistas de atletismo e a pista de vehículos teledirixidos de Frigsa, tamén se beneficiarán deste novo servizo. Finalmente, inclúense as dependencias administrativas e de servizos, como a Casa Consistorial, a sede da Policía Local e o Parque de Bombeiros.
Tal e como destacou Mauricio Repetto, edil de Transición Ecolóxica, “este contrato supón un salto qualitativo, tanto pola modernización da maquinaria como polo incremento do persoal, o que se traducirá nun servizo máis eficiente e adaptado ás necesidades da cidadanía.”
A pesar de que a previsión inicial situaba o comezo do servizo o 1 de febreiro, o contrato comezará a aplicarse de forma inmediata tras a súa sinatura o pasado 17 de xaneiro. Durante a primeira semana levarase a cabo un proceso de transición para adaptar o servizo ás necesidades reais do Plan de Servizos definido no prego de condicións.
O novo contrato inclúe a realización de diferentes tipos de tarefas, desde as limpezas habituais ata aquelas programadas ou baixo demanda, coa previsión de dispoñer de 3.400 horas anuais para cubrir necesidades extraordinarias ou imprevistas. Ademais, contempla limpezas especializadas para dependencias como centros educativos, espazos culturais e deportivos, e outras infraestruturas clave, como o Parque de Bombeiros ou a Casa Consistorial.
“A semana inicial será de adaptación, pero estamos a traballar man a man coa empresa adxudicataria para que o servizo alcance canto antes o nivel de excelencia que queremos para Lugo”, engadiu Repetto. Este esforzo conxunto ten como obxectivo garantir que os cambios e melloras previstos no contrato se implementen de maneira eficiente e sen interrupcións na calidade do servizo.
Outros aspectos destacados deste contrato son o enfoque na sostibilidade e na eficiencia enerxética. O emprego de maquinaria moderna e produtos respectuosos co medio ambiente permitirá optimizar os recursos e reducir o impacto ambiental das tarefas de limpeza. Ademais, fomentarase a formación continua do persoal para garantir un nivel de profesionalidade óptimo.
Repetto subliñou a importancia desta renovación para o benestar da cidadanía: “A limpeza das nosas dependencias municipais e dos centros educativos é clave para mellorar a calidade de vida dos usuarios e garantir un espazo seguro e saudable para todos.” O contrato busca consolidar un sistema de xestión centrado na eficacia e a adaptabilidade, respondendo ás necesidades reais das instalacións e servizos municipais.
Con esta nova etapa, o Goberno local reafirma o seu compromiso cun servizo público que atenda ás demandas actuais de forma sostible e eficiente, priorizando sempre o benestar da cidadanía.
Audio
- Mauricio Repetto, sobre o novo servizo de limpeza de edificios municipais | Descargar mp3
