A área de Gobernanza adiará até xullo o pagamento do IBI que tiña previsto xirarse este próximo mes abril.

A medida, que suporá o aprazamento duns ingresos estimados en torno aos 22 millóns de euros, obedece á vontade do goberno de Lara Méndez de protexer a liquidez das familias, emprendedores e  empresas “nun momento complexo onde case todas as economías domésticas e os sectores produtivos se poden resentir polas consecuencias derivadas do confinamento para frear a propagación do coronavirus”.

Paula Alvarellos indicou que, a pesar de que se trata dun dos tributos máis cuantioso dos que percibe o Concello, o seu cobro se posporá un mes para permitir a recuperación financeira da veciñanza e tamén do empresariado local.

“Neste momento a cidadanía precisa dispoñer deses cartos máis que as arcas municipais que, afortunadamente, se atopan totalmente saneadas. É, precisamente, debido á solvencia coa que contamos o que nos permitirá non só postergar a recadación do IBI senón desenvolver, de xeito simultáneo, a liña de axudas municipais xa anunciada que se fornecerá con cinco millóns de euros”, explicou a edil.

O equipo económico de Lara Méndez leva xa varios días traballando na modificación do calendario tributario que, neste 2020, permitirá abonar o Imposto de Bens Inmobles até o 5 de xullo se o recibo está domiciliado (actualmente o prazo remataba o 5 de xuño), e até o día 20 do mesmo mes para aquelas persoas que realicen o pago de forma presencial. Naqueles casos nos que se fraccione o pagamento, o segundo semestre poderá abonarse até o 15 de setembro.

A iniciativa comunicada hoxe súmase ás xa adoptadas polo executivo de Lara Méndez, entre as que se atopa o aprazamento doutros gravames, a cancelación das taxas de servizos que estas semanas non se están a prestar e mesmo a exoneración dos alugueres nos viveiros municipais (Tinería e CEI – Nodus) así como os dos postos comerciais da Praza de Abastos e o Mercado.

Audio

• A edil Paula Alvarellos, sobre o aprazamento do cobro do IBI | Descargar mp3