A alcaldesa de Lugo, Paula Alvarellos, asistiu á presentación do Plan Director do Corredor Atlántico en Galicia que se celebrou esta mañá na Coruña. No acto, o Ministro de Transportes e Movilidade Sostible, Óscar Puente, anunciou o adianto de fondos e a creación dun grupo de traballo coa patronal galega para facer seguimento da evolución das distintas actuacións que levan a cabo na nosa comunidade. “Recibimos con satisfacción a noticia de que o Ministerio decidise acelerar o investimento de 1.502 millóns de euros en actuacións incluídas na rede global da Rede Transeuropea de Transporte da que Lugo forma parte. Con todo, e a pesar dos avances evidenciados por este Goberno, seguiremos reclamando celeridade na mellora das nosas comunicacións, tanto ferroviarias como por estrada”, sinalou a rexedora lucense.

“Tras moitos anos de ostracismo debido á nefasta xestión realizada polos sucesivos gobernos do PP, Lugo atópese de novo na folla de roteiro do Goberno estatal en materia de infraestruturas ferroviarias. Este compromiso tradúcese en investimentos reais. É un feito constatado que na nosa cidade están a levarse a cabo importantes actuacións neste sentido, como demostra a construción da estación Intermodal ou a electrificación dos tramos Coruña-Lugo e Lugo-Ourense”, sinalou Alvarellos Fondo.

“Porén precisamos que continúen e se incrementen os investimentos e seguir avanzando na mellora da nosa conectividade, con maiores frecuencias, capacidade e velocidade e que o esforzo inversor do Estado se traduza tamén na minoración dos tempos previstos para incorporarnos ao Corredor Atlántico de Mercadorías, algo que sen dúbida será clave para a competitividade do noso municipio e do tecido produtivo local”, proseguiu a alcaldesa.  “Para lograr que os investimentos municipais no ámbito da diversificación industrial sexan verdadeiramente frutíferos, é necesario compasalos con estas tan necesarias melloras da rede de comunicacións”, apuntou.

A rexedora sinalou que “a mellora das conexións ferroviarias de Lugo co resto da península e Europa, tamén no ámbito das mercadorías, é unha reivindicación pola que o Goberno socialista de Lugo leva moito tempo traballando. Sen embargo, é decepcionante que na votación da Eurocámara onde se decidiu que Lugo estea dentro da autoestrada de transporte ferroviario europeo o PP votara en contra. Isto demostra que, cando Lugo necesita á dereita, esta sempre lle dá as costas”, concluíu a alcaldesa.