Na reunión celebrada esta mañá con Enrique Urcola tamén participou a concelleira non adscrita María Reigosa, e serviu para abordar a proposta para instalar un elemento conmemorativo nas inmediacións da ponte de As Samasas, como espazo de lembranza e posta en valor do legado do autor desta infraestrutura e que figura, no marco do acordo aprobado por unanimidade pola Corporación municipal no pasado mes de marzo.
A reunión dá continuidade ao acordo aprobado por unanimidade pola Corporación municipal no pleno do pasado mes de marzo de 2026, no que se instaba ao Ministerio de Transportes a designar esta infraestrutura co nome do enxeñeiro lucense, como exercicio de recoñecemento histórico e de xustiza cara a unha figura estreitamente vinculada ao desenvolvemento de infraestruturas na cidade.
Durante o encontro analizáronse os seguintes pasos administrativos e institucionais para continuar impulsando esta petición, despois de que o Ministerio de Transportes comunicase recentemente que “non é práctica habitual asignar nomes de particulares a infraestruturas da Rede estatal”, unha resposta que, segundo se trasladou na reunión, non pecha a porta a seguir defendendo esta iniciativa promovida polo Colexio de Enxeñeiros.
Neste sentido, tamén se abordou a posibilidade de instalar un elemento conmemorativo nas inmediacións da ponte, unha achega realizada por María Reigosa e incorporada posteriormente ao acordo plenario aprobado por unanimidade.
O goberno local destaca a importancia de continuar traballando da man do Colexio de Enxeñeiros e das entidades vinculadas á figura de Tomás Notario para seguir avanzando nun recoñecemento institucional acorde coa relevancia da súa traxectoria profesional e pública.
Tomás Notario Vacas foi enxeñeiro da Administración central con destino en Lugo, alcalde da cidade en dúas etapas e impulsor da Fundación Caixa Rural Galega Tomás Notario Vacas, entidade que concede bolsas de estudo especialmente vinculadas ao ámbito do sector primario.