O Concello de Lugo e a Facultade de Psicoloxía da Universidade de Santiago de Compostela (USC) acordaron avanzar conxuntamente para que Lugo conte co seu primeiro Plan Municipal de Saúde Mental, tras a reunión mantida hoxe pola alcaldesa, Elena Candia, con Arturo Xosé Pereiro Rozas, decano da Facultade de Psicoloxía, e Xosé Antonio Gómez-Fraguela, profesor titular e investigador da USC.

 

A elaboración deste Plan responde a un compromiso que a alcaldesa, Elena Candia, vén defendendo desde hai anos. Xa figuraba entre as súas propostas para Lugo nas eleccións municipais de 2023 e, posteriormente, foi trasladado ás propostas formuladas nos orzamentos municipais para incorporar os recursos necesarios para a súa elaboración. A súa posta en marcha forma tamén parte dos compromisos asumidos para esta etapa de Goberno.

 

O obxectivo deste traballo será analizar as necesidades de saúde mental do municipio e os recursos existentes, para, a partir deste diagnóstico, definir as principais liñas de actuación municipais neste ámbito. O proceso permitirá tamén identificar necesidades, barreiras e prioridades e establecer unha planificación das posibles medidas a desenvolver. 

 

A primeira fase incluirá a creación dun grupo de traballo no que estean representados os diferentes axentes implicados, entre eles as distintas áreas municipais, recursos sanitarios, entidades sociais, profesionais, familias, centros educativos e recursos comunitarios. A análise prestará especial atención á vulnerabilidade psicosocial, á infancia e adolescencia, á exclusión social, á soidade non desexada, ás persoas maiores, ao trastorno mental grave e ás familias e persoas coidadoras. 

 

A partir deste diagnóstico elaborarase unha proposta do Plan Municipal de Saúde Mental de Lugo, que incluirá os seus eixes estratéxicos, obxectivos operativos e posibles medidas a desenvolver, xunto cun cronograma e un sistema de avaliación. 

 

O Concello destinará 10.000 euros ao desenvolvemento deste traballo coa Facultade de Psicoloxía da USC.

 

Esta iniciativa súmase ao traballo que a alcaldesa, Elena Candia, vén impulsando para reforzar os recursos de saúde mental en Lugo, entre eles a creación dun centro de referencia de saúde mental no edificio actualmente en desuso de ASPNAIS, unha actuación que se fará realidade grazas á colaboración da Xunta de Galicia e que se atopa actualmente na fase de redacción do proxecto básico e de execución, estudo de seguridade e saúde e servizo de dirección de obras.

 

Deste xeito, o Concello avanza en dúas liñas complementarias: a elaboración do primeiro Plan Municipal de Saúde Mental de Lugo, que permitirá planificar as actuacións a partir das necesidades do municipio, e o impulso de novos recursos de referencia para a atención neste ámbito.