O Goberno local comprométese a iniciar os estudos necesarios para dar resposta a unha demanda trasladada desde hai anos pola comunidade educativa

 

Os concelleiros de Mobilidade, Antonio Ameijide, e de Educación, Javier Vázquez, mantiveron unha reunión de coordinación co equipo directivo do Centro Educativo Illa Verde para abordar a problemática dos desprazamentos do alumnado entre as distintas instalacións do centro, situadas a ambos lados da rúa Rei Xordo.

 

O encontro tivo como obxectivo analizar posibles solucións a unha situación que preocupa á comunidade educativa, xa que os estudantes deben cruzar diariamente unha vía con tráfico rodado para desprazarse entre os distintos espazos da mesma institución educativa.

 

Desde a dirección do centro trasladouse que esta demanda vén sendo formulada ao Concello desde hai anos sen que ata o momento se lle dese unha resposta.

 

Pola súa banda, o Goberno local amosou o seu firme compromiso para iniciar os estudos necesarios e elaborar unha proposta de solución acorde coa problemática existente, co obxectivo de mellorar a seguridade dos nenos e nenas que utilizan diariamente estas instalacións.

 

Durante a reunión, ambas partes acordaron traballar de forma coordinada e cooperativa na procura dunha alternativa que permita dar resposta a esta situación, compatibilizando a seguridade do alumnado co normal funcionamento da circulación, os intereses da veciñanza e o servizo de transporte público que utiliza esta vía.

 

O Goberno local comprometeuse a presentar unha proposta nas próximas semanas para avanzar cara a unha solución a unha situación que leva demasiado tempo xerando preocupación na comunidade educativa.