O prazo para pedir permiso para as fogueiras de San Xoán remata o venres

As solicitudes están a disposición das persoas interesadas nas dependencias da Policía Local

Martes, 19 de xuño de 2018
Fonte: 
Gabinete de Prensa

O Concello de Lugo informa de que este venres, 22 de xuño, remata o prazo de solicitude para pedir permiso para a celebración das tradicionais fogueiras de San Xoán, segundo o bando de Alcaldía, no que tamén se recollen as normas ás que se teñen que axustar as fogatas do Lume Novo. No mesmo, prohíbese a queima de rodas e cubertas de goma, plásticos ou calquera derivado de hidrocarburos, así como materiais ou produtos contaminantes, fedorentos ou tóxicos. Tamén queda prohibido o lanzamento de foguetes.

As fogueiras non poderán facerse en lugares próximos á liña eléctrica, inmobles, zonas verdes ou de xardíns, e naqueles nos que poidan crearse situacións de perigo. Tampouco se poderán facer dentro do recinto do casco histórico.

O responsable ou responsables, e os organizadores de cada fogueira están obrigados a retirar do lugar de celebración todos os restos que queden unha vez rematada a queima.

En caso de incumprimento do indicado ou de queixas fundamentadas da veciñanza, procederase polo Servizo de Extinción de Incendios, e a requirimento da Policía Local, a extinguir de inmediato a fogueira.

As solicitudes están a disposición das persoas interesadas nas dependencias da Policía Local e o prazo para presentalas pecharase ás 13:00 horas deste venres.

Documento

Audio

Noticias relacionadas