O Concello destina 162.000 € ao programa “Lugo con Corazón” e converte ao municipio na cidade máis cardioprotexida de Galicia

A Xunta de Goberno Local adxudicará este mércores a licitación para dotar as dependencias municipais cun total de 68 equipos DESA, 57 interiores e 11 tótems no exterior.

O contrato, que tamén inclúe o mantemento dos dispositivos, leva aparellado un programa formativo para a capacitación do persoal municipal.

 
Luns, 14 de decembro de 2020
Fonte: 
Gabinete de Prensa
O Concello destina 162.000 € ao programa “Lugo con Corazón” e converte ao municipio na cidade máis cardioprotexida de Galicia

O Concello de Lugo destinará 162.069 euros ao programa “Lugo con Corazón”, convertendo así, ao municipio, na capital máis cardioprotexida de Galicia.

A Xunta de Goberno Local que se celebrará este mércores adxudicará a Esforem Formación de Emergencias, S.L.U a adquisición de 57 desfibriladores semiautomáticos (DESA) fixos, “que serán instalados en todas as dependencias municipais - tanto urbanas como do rural- e móbiles, para os coches da Policía Local e os servizos de emerxencias, coa finalidade de axudar a unha rápida actuación ante posibles infartos”, indicou a edil de Benestar Social, Olga López Racamonde.

A concelleira sinalou tamén que, en total, o Concello destinará 107.444 euros para a compra e instalación dos equipos e 54.624 € para o seu mantemento, asinando un contrato inicial por tres anualidades.

Entre os criterios de selección tívose en conta que a empresa ofertase, como mellora do recollido nas bases, a implantación de desfibriladores exteriores, o que supuxo que o número final de dispositivos instalados ascenda a 68, 11 máis dos 57 que se prevían no prego de licitación.

“Deste xeito, Lugo situarase no cociente recomendado por Europa de 10 unidades por cada 10.000 habitantes, chegando a ser a cidade máis cardioprotexida non só da comunidade senón tamén do Noroeste peninsular”, afirmou.

López Racamonde explicou que tamén se valoraron as características funcionais dos dispositivos, o aumento do tempo de caducidade da batería ou a substitución sen custo da mesma; así como a presentación dun programa de formación en RCP básica durante os anos que dure o servizo.

“Así mesmo, a prestación inclúe un programa de capacitación do persoal municipal, que se impartirá de xeito inmediato trala implantación dos aparatos e que estará composto por clases presenciais de carácter teórico e práctico. A duración mínima dos cursos será de 8 horas, das cales, cando menos, dous terzos se destinarán ao manexo dos mesmos”, referiu a edil de Benestar.

O programa ‘Lugo con Corazón’ se estende tamén ás e aos empregados das empresas concesionarias e de cidadáns voluntarios en reanimación cardiopulmonar (RCP) e DEA, actuacións que se desenvolverán da man da Cruz Vermella, así como as accións de coordinación co 061 e campañas de sensibilización e información entre a veciñanza.

Audio

Noticias relacionadas