A alcaldesa de Lugo, Elena Candia, realizou hoxe unha valoración moi positiva da celebración do X Campionato de España de Barco Dragón 200 metros, organizado polo Club Cidade de Lugo de Piragüismo e a Real Federación Española de Piragüismo (RFEP), que converteu durante esta fin de semana a cidade no principal escenario nacional desta modalidade deportiva.

A rexedora destacou que a competición supuxo un importante impulso para o turismo deportivo e para a economía local, grazas á presenza en Lugo de centos de deportistas, técnicos, acompañantes e afeccionados chegados de numerosos puntos de España.

"Cada evento deportivo destas características é tamén unha oportunidade para a cidade. Durante toda a fin de semana Lugo recibiu visitantes que encheron hoteis, restaurantes e comercios e que, ademais de competir, puideron coñecer o noso patrimonio, a nosa gastronomía e todo o que ofrece a cidade", sinalou Candia.

A alcaldesa puxo en valor o excelente traballo desenvolvido polo Club Cidade de Lugo de Piragüismo, organizador local da competición, así como a colaboración da Real Federación Española de Piragüismo, das administracións e de todas as persoas voluntarias que contribuíron ao éxito organizativo do campionato.

Elena Candia felicitou tamén ao club lucense polos magníficos resultados acadados, que lle permitiron subir ao podio en tres ocasións e alcanzar a terceira posición por clubs no Campionato de España, así como a mesma posición na Liga Iberdrola.

A rexedora destacou ademais o valor social desta modalidade, na que tamén participaron categorías Paradragón, poñendo de manifesto que o deporte é unha ferramenta de inclusión, convivencia e superación persoal.

A alcaldesa concluíu agradecendo o esforzo de todos os clubs participantes, da organización, dos patrocinadores e das entidades colaboradoras por contribuír a que Lugo vivise unha fin de semana de deporte de primeiro nivel, reafirmando o compromiso do Concello de seguir traballando para que a cidade continúe sendo sede de competicións que xeren oportunidades, riqueza e promoción para Lugo.