Os actos conmemorativos organizados polo Concello con motivo do 18 aniversario da declaración da Muralla como Patrimonio da Humanidade teñen este venres a súa xornada central. Tras a degustación dunha gran torta onte no soto da Praza de Abastos elaborada por representantes da Asociación Lucense de Pastelerías e Confiterías, hoxe a programación comezou cun acto institucional na Mosqueira que incluíu a interpretación musical da canción de feliz aniversario ao monumento. A Alcaldesa, Lara Méndez, e membros da Corporación, a subdelegada do Goberno, Isabel Rodríguez, e o Deputado de Relacións Institucionais, Álvaro Santos, entre outras autoridades, participaron no encontro xunto cun grupo de nenos e nenas.

Xa pola tarde, tivo lugar unha exhibición de zumba polo adarve da Muralla a cargo de Jesús Illán e Noemí Cerviño e a inauguración da exposición de fotografías sobre a Muralla de Pepe Álvez: Feitas con móbil; na primeira pranta do Vello Cárcere. Logo, seis corais puxeron banda sonora ao XVIII Aniversario da Muralla como Ben Mundial. A Coral Ecos do Miño Aestelu, na Porta de Bispo Aguirre; o Coro da Asociación de Amigos do Camiño de Santiago, na Porta de San Pedro; o Orfeón Lucense, na Porta Falsa; a Schola Gregoriana Lucensis, na Porta Nova; a Coral Xolda, en Porta Miñá; e o Orfeón Xoán Montes, na Porta de Santiago. Unha vez rematada a actuación, desde o adarve da Muralla soltaranse pequenos faroliños.

O broche de ouro á programación virá da man da cantante melódica-lírica galega Andrea Pousa, que ofrecerá mañá un concerto no patio do Vello Cárcere, a partir das 20:00 horas. O acceso é libre ata completar cabida.

Para os máis pequenos e pequenas, o Concello convocou un concurso de  contos, O Anel de Pedra. O prazo de presentación dos traballos é ata o 10 de xaneiro. Posteriormente, seleccionaranse os mellores e a entidade local editará un libro con eles.