O BOP de hoxe, 26 de maio de 2009, publica a adxudicación provisional das obras de reurbanización da rúa da Industria, no polígono industrial do Ceao, que se levará a cabo ao amparo do Fondo Estatal de Investimentos Locais.

A empresa "Asogal Construcciones" é a adxudicataria desta obra, unha das máis grandes do FEIL, que ten un importe de 630.330 euros. A reurbanización da rúa da Industria empregará a 39 persoas, que traballarán en obra pública municipal nos vindeiros meses.

O Centro de Empresas e Innovación do Concello de Lugo acolle dende hoxe a realización dúas accións formativas que a Concellería de Economía e Emprego organizou dentro do plan FIP (Formación para a Inserción Profesional) e no que están a participar un total de 26 persoas en situación de desemprego.

Estas accións formativas contan coa financiación ao 100% pola Consellería de Traballo da Xunta de Galicia, e o obxectivo é instruír aos participantes no sector dos servizos profesionais a empresas co fin de dotar ás empresas lucenses de expertos en diferentes áreas.

O Concelleiro de Infraestruturas, José Piñeiro, presentou hoxe unha serie de obras que se están a efectuar na cidade e que supoñen un investimento total de 234.151 euros.

O Alcalde de Lugo, José López Orozco, o Concelleiro de Deportes, José Manuel Díaz Grandío e representantes dos grupos da oposición recibiron na Casa do Concello ás xogadoras infantís do equipo de voleibol lucense Emevé que o pasado 16 de maio acadaron o título de campioas de España en Asturias e á xogadora Ana Vidal campioa de España universitaria del volei praia que acadou o seu título en Tarragona.

O Alcalde destacou que “estes títulos acadados son un exemplo de xente nova dedicada ao deporte, un éxito para Lugo que non imos esquecer nunca”.