A Concelleira de Cultura, Turismo, Xuventude e Promoción da Lingua, Carmen Basadre, deu a coñecer este luns o cartel anunciador do San Froilán 2016, un collage, que baixo o nome de Neve e dun xeito distinto aos gañadores das anteriores edicións, integra os elementos característicos e os valores destes festexos; a artesanía, a gastronomía e a música. A edil tamén aunciou o deseño que anunciará o San Froilán Miúdo, Xa chegou, protagonizado por un polbo. “Trátase de dúas obras elaboradas por dúas mulleres luguesas, a cativa Lucía Varela Torres e Amalia Gorgoso Pacios”, subliñou Basadre ao tempo que informou que os deseños foron seleccionados por un xurado profesional composto polo profesor da Escola de Arte e Superior de Deseño Ramón Falcón, Alejandro Carro Rodríguez, o fotógrafo Pepe Alvez González, e unha profesora da Escola Politécnica Superior, María Isabel Somoza García.

O fallo produciuse esta mañá na Casa Consitorial, onde se xuntaron os máis de 80 traballos presentados ao concurso de adultos, o dobre que a pasada edición, e uns 42 aos dos máis cativos, unha decena máis que no 2015 Os gañadores recibirán un premio económico de 2.000 euros, no caso dos adultos, e un premio adaptado á idade da cativa gañadora, valorado en 300 euros.

Carmen Basadre amosou a súa satisfacción pola alta participación destes dous certames que buscaban ser as imaxes oficiais destes festexos que terán lugar do 4 ao 12 de outubro, e que no pasado ano deixaron en Lugo uns 11,5 millóns de euros e ata un 97% de ocupación hoteleira.

Audio

• Carmen Basadre, sobre o cartel do San Froilán 2016 | Descargar mp3