O Tenente de Alcalde e responsable de Mobilidade do Concello de Lugo, Rubén Arroxo, participou nunha xuntanza convocada polo Ministerio de Mobilidade dirixida aos 49 concellos do estado definidos no regulamento europeo para o desenvolvemento da rede transeuropea de transportes. O encontro tivo como obxectivo principal presentar o estado de avance dos traballos vinculados ás novas esixencias establecidas no Regulamento (UE) 2024/1679 en materia de mobilidade urbana.

Durante a sesión, abordáronse cuestións como a definición dos indicadores de mobilidade urbana recollidos no artigo 41.1 do devandito regulamento, que deberán ser recompilados e presentados antes do 31 de decembro de 2027. Así mesmo, informouse sobre os avances no desenvolvemento do Programa Nacional de Apoio aos Plans de Mobilidade Urbana Sustentable (PMUS), ao que fai referencia o artigo 41.4.

A xuntanza estivo dirixida aos equipos responsables de transporte e mobilidade urbana dos concellos implicados, co obxectivo de coordinar os esforzos e garantir o cumprimento das esixencias europeas nos programas de mobilidade urbana.

Audio

• O edil de Mobilidade do Concello de Lugo, Rubén Arroxo, sobre a xuntanza de mobilidade | Descargar mp3