Co segundo dos concertos do Festival de Música Cidade de Lugo XXXVII Semana do Corpus chega a primeira das tres citas sobre música de cámara e que estarán dedicadas á frauta neste concerto que terá lugar o luns 27 de abril, ao violoncello como homenaxe a Pau Casals o 13 de maio e ao dúo de violín e piano co recital de Massimo Spadano e Alexander Schmalcz o 15 de maio.
O destacado protagonista deste segundo concerto é o frautista francés Laurent Blaiteau, un músico que reside en Santiago de Compostela hai máis de doce anos, cidade na que desenvolve actualmente a súa actividade musical como frautista principal da Real Filharmonía de Galicia e como mestre na Escola de Altos Estudos Musicais de Galicia.
Laurent Blaiteau amosará a súa versatilidade como solista cun variado programa que inclúe obras dun amplo período da historia da música (dende o Barroco á actualidade) compostas por autores como Johann Sebastian Bach e o máis célebres dos seus fillos Carl Philipp Emanuel, o francés Marin Marais, un descoñecido como Sigfrid Karg-Elert e o o xaponés contemporáneo Kazuo Fukushima. A cita terá lugar na Fundación Caixa Galicia o luns 27 de abril ás 20:30 horas.
A entrada será gratuíta ata completar o aforo do local como é habitual no festival.
A seguinte cita do festival será o mércores 29 de abril, no Círculo das Artes, e cun programa dedicado á opereta protagonizado pola mezzosoprano vienesa Alexandra Rivas e a pianista Kristin Okerlund.
