Achado de plantas de estramonio
Ás 9’05 horas do martes 25 recíbese información na Sala do 092 sobre a existencia de varias plantas de estramonio nunha zona da rúa Chantada. O indicativo da Unidade Territorial de Policía de Barrio comisionado no lugar comproba a veracidade da información, achando varias plantas en maceteros ornamentais no exterior dun dos inmobles da vía. A través dos veciños, púidose saber a empresa que instalara os maceteros, coa cal se contactou e, ademais de asegurar que na terra utilizada non era posible o nacemento espontáneo das citadas plantas, procederon á súa retirada, informando os policías que, polas características das mesmas, o seu nacemento tiña que ser a través dunha plantación voluntaria e premeditada, polo que se iniciaron as xestións necesarias para tentar a identificación da persoa ou persoas que puidesen levar a cabo dita plantación, ao tratarse dunha planta venenosa que adoita utilizarse como droga, co perigo consecuente.
Rotura de cristal en inmediacións do HULA
Durante a mañá do martes, os axentes de Policía de Barrio foron comisionados no estacionamento municipal situado nas inmediacións do HULA, xa que, segundo unha chamada telefónica, dous mozos romperan un dos cristais dun vehículo estacionado no lugar, roubando varios obxectos do interior, ofrecendo unha descrición completa dos dous homes. De inmediato organizouse un dispositivo de procura cos indicativos dispoñibles, localizando aos mozos en cuestión nunha zona próxima, procedendo ao seu traslado a dependencias policiais, para a súa completa identificación, xa que se atopaban indocumentados, así como para a tramitación das correspondentes dilixencias, pola rotura do cristal e á espera de que o propietario do automóbil formalizase denuncia facendo constar os obxectos que faltaban do interior.
No cacheo ao que foron sometidos os dous suxeitos incautáronselles máis de 110 euros en moedas.
O automóbil foi retirado co guindastre para o depósito municipal, para garantir a súa custodia e seguridade.
Incendio en alpendre
Ás 18’10 horas do martes, a Sala do 092 comisionó un indicativo de Policía de Barrio en Villaestévez (San Juan do Alto), por un aviso de incendio. Unha vez no lugar, comprobaron que se trataba dun lume nunha edificación inmediata á vivenda, na que non había ninguén nese momento, atopándose nos labores de extinción dúas unidades dos Bombeiros, que controlaron as chamas.
Posteriormente fixeron acto de presenza os moradores da vivenda, que explicaron que no alpendre gardaban bicicletas e maquinaria de uso de xardinería, descoñecendo o que podía provocar o incendio.
Presunta violencia de xénero
Ás 0’40 horas do mércores, os axentes do Grupo Operativo Nocturno trasládanse a un domicilio de Lamas de Prado, debido ao requirimento dun home que dicía estar a discutir cunha muller. Unha vez no lugar, os axentes son recibidos por un home e unha muller (con dous nenos menores de idade), cos cales se entrevistan por separado. A pesar de que o home di que a muller non é a súa parella e que a quere botar do domicilio, porque está alugada e non lle paga, a muller manifesta que son parella e que en varias ocasións o home propinoulle golpes, ameazándoa cun coitelo (ás veces en presenza dos menores). Por devandito motivo, os axentes procederon á detención do home, que foi trasladado a dependencias policiais para a tramitación das dilixencias correspondentes.
Filtros de seguridade viaria
Durante a xornada do martes, axentes de Policía de Barrio realizaron varios controis de velocidade, procedendo á denuncia de 28 vehículos por exceder a velocidade máxima permitida, sendo sorprendido un automóbil circulando a 71 km/h nunha zona limitada a 30 km/h, o cal pode levar consigo unha sanción económica de 500 euros e a detracción de 6 puntos do permiso de conducir.
Os axentes do Grupo Operativo Nocturno sorprenderon a un condutor que manexaba o vehículo cando perdera a vixencia da súa autorización para conducir pola perda das aptitudes psicofísicas, motivo polo cal foi denunciado, procedendo á inmobilización do turismo.
Tamén observaron a presenza dun turismo que estaba a estacionar en dobre e fila e, cando contactaron co seu condutor, comprobaron que presentaba signos externos compatibles coa inxesta de alcol, polo que lle someteron ás probas de detección regulamentarias, lanzando resultado de 0.52 e 0.46 mg/L, polo que foi denunciado administrativamente.
Outro condutor foi sometido ás probas debido a unha condución irregular, obtendo resultado de 0.54 mg/L, polo que foi denunciado administrativamente.
Rescate de mozos subidos a depósitos municipais de auga
Ás 19’30 horas do mércores, unha patrulla de Policía de Barrio trasládase á rúa Mar Cantábrico, desde onde a Sala do 092 recibira a chamada de dous mozos que dicían rubir ata a parte superior dun dos depósitos de auga e que non eran capaces de descender polos seus propios medios. Os mozos foron rescatados polo Servizo de Bombeiros en perfecto estado, tras o cal abandonaron o lugar, non sen antes dar aviso á titora dun deles, xa que se trataba dun menor de idade.
Accidentes de circulación
Durante as xornadas de mércores e xoves a Unidade de Atestados atendeu varios accidentes de circulación.
Na tarde do xoves tiveron que acudir, apoiados por un indicativo de Policía de Barrio, a unha saída de vía na Rúa do Peto, onde un vehículo, ocupado por cinco persoas chocara contra un poste de telefonía. Como consecuencia do accidente resultaron lesionados os cinco ocupantes do automóbil, aínda que aparentemente con carácter leve.
O condutor do turismo foi denunciado por conducir de forma temeraria e por non realizar o curso obrigatorio de reeducación tras unha condena penal de privación do dereito para conducir, así como por ter o permiso caducado.