Localización e precinto de vehículo

Durante a mañá do xoves, axentes da Unidade Territorial de Policía de Barrio localizaron, na Praza de Santo Domingo, un vehículo cuxa procura fora requirida pola Recadación Executiva do Concello de Lugo, para o seu precinto.

O automóbil foi trasladado voluntariamente polo seu propietario ao Depósito Municipal de Vehículos, onde os policías procederon ao seu precinto, ata que o titular regularice a súa situación.

Danos por ouriños de can

Durante a tarde do mesmo día, os axentes de Policía de Barrio acudiron a un establecemento da rúa Reiseñor xa que, segundo o titular do mesmo, estaba a sufrir danos no toldo do seu negocio e na fachada do edificio, debido a que nun dos pisos superiores hai un can que ouriña na terraza e o líquido deslízase polo desaugadoiro da mesma cara ao exterior, comprobando os axentes que, efectivamente, tanto o toldo como a fachada presentaban marcas que parecían corroborar o relatado.

Os policías póñense en contacto coa propietaria do animal, que manifesta que se trata dun cachorro (que se atopaba totalmente identificado) que está a ser educado, polo que nalgunha ocasión pode provocar devanditas verteduras, polo que é advertida de que, de ser así, debería poñerse en contacto co requirente para determinar a forma de arranxo dos danos causado.

Queixas por ruídos

Durante a noite do xoves, recibíronse varias queixas por ruídos na Sala do 092, as cales foron atendidas pola Unidade de Policía de Barrio:

• Ás 00:09 horas, os axentes trasládanse a un inmoble da rúa Agro da Torna, onde un residente queixábase dos ruídos procedentes dunha vivenda fronte á súa, noutro edificio. Ao chegar os actuantes ao lugar as molestias xa cesaran, algo que foi corroborado polo requirente do servizo, polo que non se puido determinar o lugar do que procedían as mesmas.
• Ás 2:20 horas, os policías son comisionados na Avd. De Magoi, onde unha veciña manifestaba estar a sufrir molestias debido ao ruído que causaba unha lavadora durante o centrifugado. Cando os axentes tentaron contactar coa requirente, para acceder ao seu domicilio, non recibiron resposta, aínda que, minutos máis tarde, cando abandonaran o lugar, a mesma persoa realiza unha nova chamada informando de que as molestias cesaran.
• Ás 2:40 horas, unha patrulla de Policía de Barrio trasládase á Avd. de Madrid onde, segundo a información telefónica recibida, estaba a celebrarse unha festa. Unha vez no interior do edificio, os axentes comproban que só se escoitan algunhas voces e berros esporádicos dalgún neno de pouca idade, polo que contactan cos moradores do piso de procedencia, comprobando que non existen indicios de ningunha festa.