A alcaldesa destacou o gran coñecemento que ten desta área e o seu traballo previo na xestión ambiental, xunto aos dous anos que ocupou o posto en comisión de servizo.
A área de Medio Ambiente do Concello de Lugo conta desde hoxe cun novo xefe de servizo, trala toma de posesión deste posto por parte de Miguel Negral, que xa ocupou este cargo durante os últimos dous anos en comisión de servizo. A alcaldesa, Paula Alvarellos, presidiu a toma de posesión a primeira hora da mañá, acompañada do concelleiro en funcións da citada área, Mauricio Repetto e do secretario Municipal, Justo Díaz Rodríguez.
Trala sinatura da acta, a alcaldesa sinalou a satisfacción por este nomeamento que vén a reforzar unha das áreas máis importantes da xestión municipal cun “traballador da casa, cunha ampla experiencia en xestión ambiental e municipal e de xeito especial na xestión de proxectos medioambientais para a conservación, protección e mellora da calidade medioambiental, e na dotación de infraestruturas de abastecemento e saneamento tanto na zona urbana como nos núcleos rurais da cidade”.
