O Executivo de Paula Alvarellos vén de adxudicar o contrato do novo servizo de reparacións e apoio técnico para as redes de abastecemento e saneamento de auga de Lugo, que se activará de inmediato. Cun orzamento anual de 423.500 euros, o contrato busca optimizar o mantemento destas infraestruturas esenciais, garantindo unha resposta eficaz e continuada ante calquera incidencia.

O novo servizo permitirá atender as avarías fóra do horario habitual da brigada de augas, reforzando o operativo activado nos últimos meses. "Con esta contratación, buscamos garantir un sistema máis áxil, fiable e preparado para as demandas do día a día, ademais de asegurar unha xestión máis eficiente dos nosos recursos", explicou Mauricio Repetto. Esta medida supón un paso máis no compromiso do Goberno local por mellorar a calidade das infraestruturas que resultan clave para o benestar da veciñanza.

A empresa Gestagua será a encargada de prestar este servizo, que terá unha duración inicial dun ano, prorrogable por outro adicional. O contrato inclúe unha distribución orzamentaria de 302.500 euros anuais para a rede de abastecemento e 121.000 euros para a de saneamento. Repetto subliñou: "Estamos a avanzar cara a unha xestión máis sostible das redes de auga, unificando esforzos para ofrecer unha maior calidade e seguridade nas intervencións."

Ademais, a nova contratación permitirá reforzar o mantemento preventivo e correctivo, anticipándose a posibles problemas e reducindo tempos de resposta ante emerxencias. "Con iniciativas como esta, reforzamos o noso compromiso co progreso da nosa cidade e coa protección dun recurso tan vital como a auga", engadiu o concelleiro.

Audio

• Mauricio Repetto, sobre o contrato do servizo | Descargar mp3