Un total de 200 persoas participaron onte nunha xornada do Consello Escolar de Galicia, organizada como encontro cos membros dos consellos escolares dos centros de ensino non universitario e cos integrantes dos concellos municipais. A xornada contou coa presenza do Alcalde de Lugo, José López Orozco; do Delegado de Educación, José Rábade, e da Vicepresidenta do Consello Escolar de Galicia, Milagros Blanco.

O obxectivo desta reunión era fomentar a participación de todos os sectores da sociedade no proceso de mellora do sistema educativo.

Durante a reunión, os membros do Consello Escolar de Galicia tiveron a oportunidade de trasladar aos representantes da comunidade educativa cuestións como a importancia da participación nos órganos colexiados de control e goberno dos centros no marco da Lei Orgánica de Educación (LOE) ou a relación con outros órganos de participación. Ademais, presentaron a campaña A participación da comunidade educativa na mellora da calidade do ensino, e dialogaron sobre as necesidades ás que se enfrontan os Consellos Escolares.

O Alcalde felicitou ao Consello Escolar por esta iniciativa destinada a integrar a pais, profesores e alumnos no proceso educativo. Así mesmo, mostrou o agradecemento do Concello de Lugo, onde leva funcionando o Consello Escolar Municipal, dende o 1999, polo traballo realizado neste tempo e por esta iniciativa de relanzamento.

Indicou tamén o Alcalde que a educación non deixa de ser o traballo máis bonito, "para farcer homes libres e cidadás democráticos".

Esta actividade forma parte dunha rolda de encontros que o Consello Escolar de Galicia está a realizar en diversas cidades e concellos da comunidade galega. Segundo afirmou a Vicepresidenta deste órgano de consulta, Milagros Blanco, esta iniciativa está a acadar un grande éxito, xa que nas xuntanzas celebradas na provincia da Coruña contaron coa participación de máis de 720 membros dos consellos municipais e de centros de ensino. O encontro desta tarde constitúe o primeiro da provincia de Lugo. A próxima semana, a actividade continuará no Concello de Viveiro.

A rolda de encontros está orientada á consecución dunha participación real e efectiva de todos os sectores das comunidades educativas nos consellos escolares; así como dar a coñecer á sociedade o Consello Escolar de Galicia como máximo órgano de participación e consulta.

Outro dos obxectivos é o de colaborar cos concellos que teñen constituído o Consello Escolar Municipal co fin de impulsar a revitalización destes órganos, así como fomentar a súa creación nos concellos nos que aínda non estean constituídos. Ademais, durante estas reunións elaboraranse unha serie de enquisas que recollerán información relevante de cara á organización dunhas xornadas específicas para os membros dos consellos escolares, que se desenvolverán no primeiro trimestre do curso 2007/2008.