A Xunta de Goberno Local adxudicará esta semana á empresa Construcciones Sanle Lugo S.L. as obras de renovación das redes de abastecemento nas rúas Aviación Española (156.131 €) e Rei don García (89.311 €).

Os traballos, que terán un prazo de execución de 7 e 4 meses, respectivamente, supoñen, no seu conxunto, un investimento de 245.442 €.

Ámbalas dúas actuacións enmárcase dentro do plan municipal que o executivo de Lara Méndez está a desenvolver para erradicar a presenza de fibrocemento nas canalizacións da cidade. Un obxectivo para o que a área de Medio Ambiente, que dirixe Álvaro Santos, consignou 1’2 millóns de euros.

As intervencións terán como finalidade a substitución das tubaxes actuáis por outras de fundición nun total de 250 acometidas da capital, 60 delas só nestas dúas rúas (33 en Aviación Española e 27 en Rei don García) co obxectivo de “mellorar os servizos públicos apostando ademais por infraestruturas máis eficientes que incrementarán tamén a calidade da prestación que xa se ofrece”, segundo sinalou Santos Ramos.

O edil de Medio Ambiente explicou, así mesmo, que, “logo de abordar xa os proxectos previstos para as rúas Bataneira e Figueira e Escultor Asorei, o cronograma establecido para desenvolver estas tarefas continuará desenvolvéndose por Armórica, a marxe dereita da avenida Marqués de Ombreiro e boa parte do barrio da Cheda que inclúe as rúas Río Landro, Eume, Pousadela, Masma, Sar, Pambre e Azúmara.

“De maneira que nos vindeiros meses, segundo os procedementos de contratación - xa en curso - se vaian resolvendo, se acometerán os traballos que comprenderán, ademais da substitución das canalizacións, a renovación completa das beirarrúas, que suman 6.550 metros de pavimento, para actuar dunha forma integral sobre estas vías”, concluíu Álvaro Santos.

Audio

• O edil de Medio Ambiente, Álvaro Santos, sobre o fibrocemento en Aviación Española e Rei don García | Descargar mp3