Para Daniel Piñeiro non cabe dúbida da importancia no eido da historia da cidade destes libros, coñecidos anteriormente como Libros do Consistorio, xa que a primeira acta de Pleno do Concello data do ano 1545
- Tema
O Concelleiro de Desenvolvemento Sostible e Persoal, Daniel Piñeiro, explicou este mércores que o Concello celebra ao longo do día de hoxe o Día Internacional dos Arquivos, posto que o día 9 de xuño de 1948, a UNESCO creou o Consello Internacional de Arquivos (CIA). Tal e como deu a coñecer o edil, o Arquivo Municipal de Lugo únese a esta celebración coa posta a disposición dos veciños e veciñas lucenses, en aras do seu coñecemento, así como dos investigadores, dos Libros de Actas de Pleno do século XVI, a través da páxina web do Concello. Tamén se inclúe unha selección de fotografías, así como a historia da celebración deste día.
Para Daniel Piñeiro non cabe dúbida da importancia no eido da historia da cidade destes libros, coñecidos anteriormente como Libros do Consistorio, xa que a primeira acta de Pleno do Concello data do ano 1545. A publicación destes libros entra dentro do ámbito de achegamento á cidadanía dos fondos documentais que conmemoran a memoria da cidade de Lugo, unha actuación que está a levar a cabo o Goberno Municipal para avanzar na administración electrónica.
A dixitalización e publicación dos seis libros de Actas de Pleno deste século supón, ademais dunha medida de conservación duns documentos, a súa dispoñibilidade de ser consultados de forma on line, levando deste xeito o arquivo á casa dos interesados. Trátase dunha dixitalización conseguida a través do obradoiro Arqueolvcvs, “o que supón unha gran vantaxe para a súa difusión e acceso aos mesmos, tanto dos que xa posúen valor histórico como os que soamente teñen valor administrativo, garantindo así mesmo a transparencia da administración”, subliñou Piñeiro.
Audio
- Daniel Piñeiro, sobre o Día Internacional dos Arquivos | Descargar mp3