En relación coas recentes informacións publicadas sobre o accidente de tráfico ocorrido o pasado 1 de maio de 2023 na intersección das rúas Manuel María e Otero Besteiro, a Policía Local traslada as novas actuacións levadas a cabo por esta Xefatura no devandito suceso, especialmente pola Unidade Administrativa de Sancións (UAS), que permiten contextualizar mellor e explicar os traballos policiais neste ámbito.

No seu momento, o accidente xerou unha notable alarma debido á súa localización, a hora e as circunstancias: un vehículo de alta gama que impacta contra varios coches estacionados, cunha terraza moi concorrida a escasos metros e con menores xogando nas proximidades. A nosa actuación foi inmediata e completamente profesional, coa elaboración dun atestado detallado e contigua posta en coñecemento á Autoridade Xudicial de todos os elementos necesarios para valorar a gravidade dos feitos.

Quizá debido á resolución xudicial interpretouse que a absolución na causa penal significaba que “non pasara nada” ou mesmo que o traballo policial non fora o correcto. Nada máis lonxe da realidade. O propio fallo xudicial recolle que a condución foi “claramente inadecuada” e que existiu un risco grave para terceiros, aínda que non se alcanzou a tipificación que esixe o Código penal para condenar a modalidade delituosa desa condución temeraria.

Precisamente por iso, e porque a sentenza non cuestiona a existencia dos feitos nin invalida o traballo policial realizado no lugar, a UAS exerceu as súas competencias conforme ao artigo 85 da Lei de Tráfico, Circulación de Vehículos de motor e Seguridade Viario, que permite iniciar un procedemento sancionador administrativo cando o proceso penal finaliza sen condena, a condición de que non se declarou a inexistencia do feito.

Grazas a esta dilixencia na súa actuación, actualmente tramítase o correspondente expediente sancionador por unha infracción moi grave de condución temeraria administrativa, por realizar manobras de derrapaxe nunha curva a velocidade inadecuada, perdendo o control do vehículo e impactando contra outros turismos. Esta infracción conleva unha sanción de 500 euros e a perda de 6 puntos do permiso de conducir.

Con estas actuacións desde a Policía Local déixase claro que, cando se trata de seguridade viaria, existen distintos camiños xurídicos que permiten dar resposta a condutas graves na circulación e que traballaremos en todos eles para a súa protección.

É importante que a cidadanía o saiba, o noso compromiso coa seguridade viaria dos lucenses é absoluto. Contra a condución irresponsable, non hai impunidade, hai profesionalidade, constancia e resultados.