Delitos contra a seguridade viaria

Efectivos do Grupo Operativo Nocturno da Policía Local de Lugo e a Unidade de Atestados do Corpo detectaron os seguintes DELITOS CONTRA A SEGURIDADE VIARIA:

• Accidente de circulación na rúa San Roque no que un vehículo choca contra un estacionado, observando que a condutora presentaba signos de embriaguez, sendo sometida ás probas de detección alcohólica, lanzando un resultado POSITIVO de 0,79 mg/l, instruíndose dilixencias por delito contra a seguridade viaria na modalidade de Xuízo Rápido.
• Na Estrada de Ombreiro con Músico Falla prodúcese outro accidente no que unha condutora presentaba signos de embriaguez, sendo requirida para someterse ás probas de detección alcohólica, NEGÁNDOSE DE FORMA EXPRESA, a pesar de ser advertida das graves consecuencias que iso conleva, instruíndose dilixencias por delito contra a seguridade viaria na modalidade de Xuízo Rápido.
• Na rúa Villalba dáse o alto a un vehículo que circulaba de forma irregular, observando os axentes que o condutor se achaba baixo os efectos de bebidas alcohólicas, sendo sometido ás probas de alcoholemia, lanzando un resultado POSITIVO de 0,70 mg/l, instruíndose dilixencias por delito contra a seguridade viaria na modalidade de Xuízo Rápido.

Actividade de aparcacoches non autorizada

Os días 15 e 17 do presente mes de novembro, estableceuse un dispositivo especial para combater a actividade ilegal de aparcacoches na contorna do HULA, no que participaron efectivos da Unidade Territorial de Policía de Barrio da Policía Local de Lugo, co emprego de vehículos policiais rotulados e camuflados, levantando 11 actas de denuncia a SETE persoas sorprendidas na calzada indicando aos condutores lugares de aparcamento, co consecuente risco para a súa integridade e para os demais usuarios da vía, causando molestias innecesarias.

Das once actas, sete delas foron por infracción á Ordenanza de Circulación e catro por infracción á Lei de Seguridade Cidadá, por desobediencia aos axentes da autoridade, xa que ao ser requiridos para que cesasen na devandita conduta, foron sorprendidos momentos despois realizándoa.

Destaca a súa reincidencia xa que, dos denunciados por desobediencia, un deles foi denunciado no que vai de ano 21 veces; outro foi denunciado 3 veces; outro 14 veces e o outro 11 veces neste ano.