Discusión familiar
Durante a tarde do domingo, un indicativo da Unidade Territorial de Policía de Barrio foi comisionado no barrio de Castelo, desde onde se informou á Sala do 092 sobre un varón ebrio con intencións suicidas. Os axentes contactaron cos familiares do varón, que relataron que se comportara verbalmente de forma agresiva cando lle retiraran as chaves do coche, do cal pretendía facer uso atopándose en estado de embriaguez; momento no que, como noutras ocasións, amosara intencións autolíticas. Tras comprobar o estado do home, os axentes solicitaron a presenza dunha ambulancia, que finalmente procedeu ao seu traslado ao HULA, sendo acompañada polo servizo policial.
Localización de menor fugado
Durante a tarde do domingo, un indicativo da Unidade Territorial de Policía de Barrio procedeu á identificación dun menor na rúa Reiseñor, resultando finalmente que dito mozo fuxira do Centro Educativo Santo Anxo. O menor foi trasladado de novo ao citado centro por axentes da Policía Autonómica, que foron requiridos para tal cometido.
Gorrillas
Os axentes da Unidade Territorial de Policía de Barrio destinados ao dispositivo de vixilancia e control de actividades irregulares de aparcacoches nas inmediacións do HULA procederon á identificación de dúas persoas que, internándose na calzada, facían sinais aos vehículos indicándolles os lugares libres para estacionamento, polo que os axentes confeccionaron denuncias administrativas polos feitos.
Filtros de seguridade viaria
Durante os filtros de seguridade viaria levados a cabo polos axentes da Policía Local puidéronse detectar e corrixir as seguintes infraccións:
Condutor que circula de forma irregular pola rúa Yáñez Rebolo e dá un resultado positivo nas probas de alcoholemia (0,60 e 0,56 mg/L), polo que se confecciona denuncia administrativa (1000 € e retirada de 6 puntos do permiso de conducir).
Condutor que é sorprendido por unha patrulla da Policía Nacional cando circula pola rúa García Abad en sentido contrario ao establecido. Os axentes da Unidade de Atestados realizan as probas regulamentarias, nas que dá un resultado de 1,10 e 1,13 mg/L, polo que se instrúen dilixencias por un presunto delito contra a seguridade viaria, polo procedemento de xuízo rápido.
Localización de dúas furgonetas con placas de matrícula temporais de importación holandesas, as cales non están vixentes, xa que a súa vixencia está ligada á inspección técnica periódica do vehículo e a mesma está caducada. Os vehículos son trasladados ao depósito municipal e posteriormente inmobilizados nun garaxe do propietario, ata que se documenten os automóbiles para a súa circulación.
Nos controis de velocidade levados a cabo na Calzada das Gándaras, Alfonso X o Sabio, Avda. de Madrid, Rolda da Muralla, Avda. Infanta Elena, Estrada Vella de Santiago e Avda. de Benigno Rivera, controláronse 976 vehículos, sendo denunciados 132 deles por superar a velocidade máxima permitida en cada unha das vías citadas; sendo a velocidade máis alta captada de 104 km/h nunha zona da Avda. Benigno Rivera limitada a 50 km/h.