Actuación por presunta agresión, ameazas e furto
Durante a tarde do pasado venres, a Sala do 092 recibiu unha chamada alertando da presenza dun individuo agresivo nun establecemento da Rolda da Muralla. Ata o lugar desprazouse un indicativo da Unidade Territorial de Policía de Barrio, cuxos compoñentes foron informados de que o suxeito ameazara a varios clientes, facilitándose a súa descrición física.
Posteriormente, comprobouse que o mesmo home protagonizara feitos similares noutro establecemento próximo, onde tamén tentara subtraer diversos produtos.
Finalmente, os axentes localizárono nun local de hostalaría da rúa San Pedro, onde presuntamente agrediu a un home que intentaba protexer á súa nai, de 85 anos, das molestias que estaba a causar. A vítima foi asistida por persoal sanitario requirido polos axentes e trasladada posteriormente a un centro hospitalario para unha valoración máis exhaustiva.
O individuo foi conducido a dependencias policiais para a súa identificación e a tramitación das correspondentes dilixencias. Ademais dos feitos descritos, comprobouse que portaba un teléfono móbil que fora subtraído “ao descoido” noutro establecemento do centro da cidade.
Detención por presunto intento de agresión sexual
Durante a tarde do luns recibíronse varias chamadas na Sala do 092 informando da presenza dun home nas inmediacións da Rolda da Muralla con Montero Ríos que estaba a insultar e ameazar a viandantes. Un indicativo da Unidade Territorial de Policía de Barrio desprazouse ao lugar, procedendo á súa identificación, sen que fose necesaria máis actuación nese momento.
Posteriormente, recibiuse o requirimento dunha muller na Estación de Autobuses, que manifestaba sentirse acosada por un home. Segundo relatou aos axentes, o individuo tentara bicala e realizarlle tocamentos contra a súa vontade, seguíndoa tanto polo exterior como polo interior das instalacións.
Os policías comprobaron que se trataba do mesmo suxeito identificado anteriormente. Ao decatarse da presenza policial, o home tentou fuxir á carreira, sendo perseguido e interceptado polos axentes, que procederon á súa detención e traslado a dependencias policiais.
A muller rexeitou o ofrecemento de acompañamento a dependencias policiais nese momento, xa que abandonaba a cidade, indicando que valoraría formalizar a correspondente denuncia no seu lugar de residencia.
Infraccións á Lei de Protección da Seguridade Cidadá
Durante a noite do sábado, axentes do Grupo Operativo Nocturno que realizaban labores de vixilancia na zona acoutada da Muralla afectada pola caída parcial do muro interior identificaron a catro mozos que, tras retirar o valado e a cinta policial, accederon ao espazo máis próximo ao desprendemento, asumindo un evidente risco para a súa integridade.
Por estes feitos, foron propostos para sanción por unha presunta infracción á Lei de Protección da Seguridade Cidadá.
Este tipo de condutas supón, ademais, un risco engadido para o resto de usuarios da vía, xa que a retirada da sinalización pode facilitar o acceso á zona a persoas que descoñezan o perigo existente.
Seguridade viaria
Nos últimos días, os dispositivos de control de seguridade viaria permitiron detectar varios condutores que circulaban tras inxerir alcol ou drogas. As intervencións realizáronse na avenida Rodríguez Mourelo, avenida da Coruña, rúa Mariña Española, Monte Faro e Armando Durán.
Infraccións administrativas:
- Probas de alcoholemia con resultados de: 0.60/0.58; 0.34/0.39; 0.58/0.51; 0.41/0.40 mg/L.
- Proba de drogas con resultado positivo en cocaína.
Infracción penal:
- Proba de alcoholemia cun resultado de 0.52/0.52 mg/L, no caso dun condutor como presunto responsable dun accidente de circulación.