Detido por violencia de xénero tras unha intervención nun domicilio do centro de Lugo

A Policía Local de Lugo detivo a un home no interior dunha vivenda da zona centro da cidade tras recibir aviso dunha posible agresión á súa parella. A vítima foi atendida polos servizos sanitarios tras mostrar signos de ansiedade e relatar episodios de violencia.

Durante a madrugada do martes 6 de agosto, sobre a 01:35 horas, unha dotación da Policía Local de Lugo foi comisionada pola Sala do 092 para acudir con carácter urxente a un edificio da zona sur da cidade. O aviso, procedente do 112, informaba dunha posible agresión no interior dunha vivenda, na que, segundo un veciño, un home estaba a golpear á súa parella.

Á súa chegada, os axentes entrevistáronse co veciño, quen manifestou que os berros e discusións procedentes do domicilio eran constantes, e que ese día escoitara o que lle pareceu unha pelexa.

Aínda que inicialmente a muller negou episodios de violencia, despois recoñeceu que fora agredida, polo que procedeuse á súa atención médica urxente.

Ante a gravidade dos feitos, a Policía Local procedeu á detención inmediata do home, quen foi informado dos dereitos que lle asisten. Tras o seu paso polo centro de saúde para a elaboración do parte médico, foi trasladado a dependencias policiais para a instrución de dilixencias e custodia policial á espera de pasar a disposición xudicial.

Reforzo de protección a vítimas de violencia de xénero durante o verán

Este caso súmase a outras actuacións recentes nesta semana por violencia de xénero en Lugo. En cumprimento das directrices extraordinarias emitidas pola Secretaría de Estado de Seguridade, a Policía Local de Lugo reforzou os mecanismos de vixilancia e atención a posibles vítimas, especialmente en contextos de convivencia prolongada e estrés ambiental propios do verán, con medidas que inclúen; o incremento de patrullas e vixilancia activa en horarios nocturnos e fins de semana, maior seguimento a casos con antecedentes ou especial vulnerabilidade e unha atención inmediata a calquera testemuño ou aviso procedente da contorna veciñal.

Compromiso institucional coa protección

A Policía Local de Lugo quere agradecer expresamente a colaboración cidadá, que foi clave para intervir de forma rápida e eficaz no aumento de casos. Animamos a todas as persoas que coñezan situacións similares a non mirar cara a outro lado e dar o paso de avisar aos servizos de emerxencia. A violencia de xénero non é un problema privado. É unha cuestión de seguridade pública e de dereitos fundamentais. Nin unha vítima soa. Nin unha agresión sen resposta.