Actuación policial en defensa das vítimas de violencia de xénero

Durante a madrugada do pasado 5 de agosto, axentes da Policía Local de Lugo, interviñeron nun grave incidente de violencia de xénero ocorrido no interior dun domicilio situado na zona sur da cidade. A intervención culminou coa detención de dúas persoas e a incautación dun coitelo de grandes dimensións, tras producirse unha agresión mutua no contexto dunha discusión de parella.

A actuación iniciouse tras recibir aviso na sala do 092 alertando sobre berros nun piso. Unha vez no lugar, os axentes observaron a unha parella discutindo no descanso do inmoble. O home presentaba un corte na man esquerda e portaba unha maleta coa aparente intención de abandonar o lugar. Ao entrevistarse por separado coa muller, os axentes comprobaron que tiña erosións visibles na man dereita e marcas nos brazos.

Ambos detidos foron informados dos seus dereitos conforme á lexislación vixente e trasladados a dependencias policiais. Os axentes actuantes tamén contactaron cos servizos sanitarios para asegurar a correcta atención das lesións, e comunicaron o caso á unidade especializada en violencia de xénero para o seguimento correspondente.

Desde a Policía Local de Lugo queremos reiterar o compromiso absoluto coa protección das vítimas de violencia de xénero. Nestes casos, a intervención inmediata e profesional é clave para evitar consecuencias maiores, especialmente cando ven implicadas armas brancas, como ocorreu nesta ocasión.