Durante a pasada semana, a Policía Local de Lugo desenvolveu diversas actuacións no ámbito da seguridade cidadá, moitas delas iniciadas de oficio pola propia vixilancia preventiva que se realiza de maneira continua na cidade, co obxectivo de previr situacións de risco e garantir a tranquilidade pública.
Actuación de oficio por agresión na vía pública
Axentes de paisano que se atopaban realizando labores de vixilancia no casco histórico escoitaron fortes berros de auxilio procedentes da Rúa Nova. Ao acudir ao lugar, observaron unha moza no chan rodeada por un grupo de persoas que lles indicaron que acababa de ser agredida por un grupo de catro mulleres, quen fuxiran tras a agresión.
De inmediato, os axentes iniciaron a persecución, logrando localizar a tres das agresoras no Carril das Estantigas e á cuarta na Avenida da Coruña, grazas á coordinación con outras unidades policiais. A vítima foi asistida no lugar e trasladada en ambulancia, presentando un forte golpe na zona cervical. Instruíronse as dilixencias oportunas por estes feitos.
Con esta actuación reflíctese a importancia do traballo proactivo das patrullas a pé e o compromiso da Policía Local no espazo público.
Detención por atentado á autoridade e negativa á identificación
Na madrugada do día 29, na rúa Montero Ríos, axentes da unidade de Policía de Barrio observaban unha muller que circulaba en patinete eléctrico en sentido prohibido. Ao darlle o alto, comprobaron que presentaba signos evidentes de atoparse baixo os efectos do alcohol. Requirida para someterse á proba de alcoholemia, a muller negouse de forma reiterada e, á súa vez, negouse tamén a identificarse. Lonxe de depor a súa actitude, intentou abandonar o lugar no patinete, tendo que ser retida polos axentes. Nese momento arremeteu contra eles, propinando varios golpes a unha das axentes, que precisou asistencia médica.
Finalmente foi detida por un presunto delito de atentado contra axentes da autoridade, desobediencia e resistencia. Formuláronse ademais denuncias administrativas pola negativa á identificación e por negarse a someterse ás probas regulamentariamente establecidas para a detección de alcohol. Este tipo de situacións reflicten o risco engadido que supón a condución de patinetes eléctricos baixo a influencia de alcohol ou substancias, e a necesidade de lembrar que a condución destes vehículos está suxeita ás mesmas normas de tráfico e seguridade que o resto.
Desde a Xefatura da Policía Local de Lugo destácase o rápido e eficaz traballo das patrullas, tanto na prevención como na intervención en feitos delituosos e alteracións da orde pública, subliñando que todas estas actuacións teñen como fin último a protección das persoas e a preservación da convivencia na cidade.
Lémbrase así mesmo que a colaboración cidadá, como no caso dos testemuños da agresión na Rúa Nova, é sempre esencial para lograr unha resposta inmediata e efectiva.