Controis de tráfico

A Policía Local intensificou durante os últimos días os controis de tráfico en diversos puntos da cidade, co obxectivo de detectar condutas de risco e garantir unha mobilidade segura, tanto para condutores como para peóns e usuarios de vehículos.

Froito deste dispositivo, formuláronse:

• 8 denuncias administrativas por alcoholemia con taxas inferiores a 0,50 mg/l, ademais de:
• 2 denuncias por taxa superior a 0,50 mg/l, con sancións de ata 1.000 euros e retirada de 6 puntos.
• Tamén se rexistrou 1 positivo en drogas por consumo de cocaína.

Ademais, os axentes instruíron dilixencias penais contra un condutor que circulaba baixo os efectos do alcol sen dispoñer do permiso de condución en vigor, un comportamento de altísimo perigo que foi atallado de forma inmediata grazas á rápida intervención policial.

Na madrugada do día 31, durante labores de vixilancia e seguridade do tráfico na Avenida de Madrid, en dirección ao centro da cidade, a unidade de Atestados da Policía Local observou un turismo, circulando a unha velocidade anormalmente reducida e realizando manobras sobre a liña descontinua que separa os carrís.

Ao chegar ao semáforo situado na confluencia da Avenida de Madrid coa Rolda Xosé Castiñeiras, o vehículo detívose ante a luz vermella. Cando o semáforo cambiou a verde, o turismo permaneceu detido, sen iniciar a marcha. Ante esta situación, os axentes situáronse paralelamente ao vehículo para entrevistarse co condutor, ao que observaron síntomas compatibles coa inxesta de bebidas alcohólicas, tales como pupilas dilatadas, rostro de cansazo e forte halitosis alcohólica.

Por este motivo, os axentes indicaron ao condutor que estacionase na marxe dereita da vía, procedendo á súa identificación.

Tras informarlle dos seus dereitos e da obrigatoriedade de someterse ás probas de detección alcohólica, o condutor lanzou resultados positivos de 0,80 e 0,68 mg/l de alcol en aire expirado. Informóuselle dos seus dereitos como investigado non detido por un presunto delito contra a seguridade viaria, tipificado no Código penal.

Tamén detectáronse dous condutores que circulaban con perda de vixencia por carecer da totalidade dos puntos sen realizar o correspondente curso de reeducación e sensibilización viaria, sobre os cales tamén se instruíron dilixencias penais.

Alcol con taxa inferior a 0,50 mg/l

• Total: 8 denuncias
• Sanción: 500 € e retirada de 4 puntos
• Taxas rexistradas: 0,27 / 0,29 / 0,30 / 0,40 / 0,33 / 0,32 / 0,36/  0,49 mg/l

Alcol con taxa superior a 0,50 mg/l

• Total: 2 denuncias
• Sanción: 1.000 € e retirada de 6 puntos
• Taxas rexistradas: 0,53 / 0,52 mg/l

Presenza de drogas no organismo

• Total: 1 denuncias
• Sanción: 1.000 € e 6 puntos
• Casos: COC - 6 puntos
• Medidas complementarias: retirada de vehículos con orde municipal

Como parte do traballo conxunto cos servizos municipais, procedeuse ao precinto dun vehículo con orde de execución ditada polo Concello de Lugo, garantindo así o cumprimento das resolucións administrativas e contribuíndo á ordenación e seguridade do espazo público.

Asistencia social e atención a persoas en situación de vulnerabilidade

Auxilio a unha muller ferida na vía pública

A Policía Local asistiu a unha muller que sufriu unha caída na rúa Quiroga Ballesteros, fronte ao Mercado de Abastos. Os axentes prestaron os primeiros auxilios e coordinaron o seu traslado ao hospital, para a mellor atención á cidadá.

Colaboración sanitaria con paciente en estado alterado

Axentes interviñeron en apoio a unha ambulancia do 061 ante un paciente que presentaba un cadro médico complexo. A actuación desenvolveuse con tranquilidade, permitindo a súa estabilización e posterior traslado hospitalario, priorizando en todo momento a súa saúde e seguridade.

Rescate a unha muller maior tras activación da alarma de auxilio

Tras o aviso de Cruz Vermella, a Policía Local logrou acceder á vivenda dunha señora de 84 anos que non respondía tras activar o seu dispositivo de emerxencia. Grazas á colaboración de veciños, bombeiros e servizos médicos, comprobouse o seu estado de saúde e xestionouse a chegada do seu fillo desde A Coruña para o seu acompañamento e coidados.

Apoio asistencial en traslado domiciliario

A requirimento de Cruz Vermella, unha patrulla prestou apoio humanitario trasladando con coidado a unha persoa con mobilidade reducida desde o salón ata a súa cama no seu propio domicilio.

Control sobre a venda ambulante non autorizada en zonas de mercado municipal

No marco deste dispositivo de control, detectáronse recentemente 7 infraccións administrativas por ocupación da vía pública con venda ambulante sen autorización. Concretamente, 2 delas localizáronse nas inmediacións da Praza de Abastos e 5 nos arredores do mercado de Frigsa.