Un 73,62% dos lucenses que contestaron na enquisa semanal da páxina web www.lugo.es reutiliza as bolsas dos supermercados para botar o lixo ós contedores, costume que recomenda evitar a campaña publicitaria Lugo limpo gústame máis porque estas bolsas non están preparadas para esta función e rompen con facilidade. Segundo explica a Concellería de Medio Ambiente, ó romper prodúcense verquidos á calzada e nos contedores que contaminan o ambiente e perxudican a nosa vida cotiá.

O Concello de Lugo está estudando a posibilidade de habilitar lugares específicos nas novas urbanizacións para ubicar os colectores soterrados. A intención do equipo de goberno é construír este tipo de colectores para dar servizo ás novas urbanizacións, evitando que ocupen espazo innecesario nas vías públicas e provoquen olores.

Continúa aberto o prazo de inscrición na xornada técnica A Xestión dos Residuos Urbanos, organizada pola concellería de Medio Ambiente, en colaboración coa Universidade de Santiago de Compostela. Ata o de agora xa se cubriron case a metade das prazas, pero manterase aberta a inscrición ata o día do congreso.

A Concellería de Medio Ambiente lembra ós cidadáns que o próximo mércores pola noite, día 3 de novembro, non haberá servizo de recollida de limpeza. Como tódolos anos por estas datas, os operarios de Urbaser celebran a súa festividade, San Martín de Porres. Por este motivo, a Concellería fai un chamamento á poboación para que colaboren no posible, evitando encher os colectores de lixo. O xoves quedará reestablecido o servizo.