A Alcaldesa avanza á veciñanza de Fontiñas que as obras do ascensor empezarán o vindeiro mes

Esta dotación pública, moi demandada pola cidadanía, é posible grazas a que o Goberno de Lara Méndez consignou os fondos necesarios nos Orzamentos deste ano que foi quen de sacar adiante

As obras de mellora da accesibilidade da rúa Outono rematarán esta semana

Luns, 13 de agosto de 2018
Fonte: 
Gabinete de Prensa
130818 Xuntanza veciñal Fontiñas

A Alcaldesa de Lugo, Lara Méndez, mantivo este luns unha xuntanza con veciños e veciñas do barrio de Fontiñas, aos que detallou a situación de varias obras de mellora da mobilidade na zona, a máis destacada, a instalación do ascensor público e humanización do entorno que o Goberno proxecta para conectar a ronda e a rúa Ramón Montenegro, que comezará o vindeiro mes, unha vez adxudicado o proxecto e asinado o contrato.

Esta actuación, moi demandada pola cidadanía, que mellorará de maneira substancial a accesibilidade de Fontiñas, é posible grazas a que o Executivo de Méndez consignou os fondos necesarios para levala a cabo nos Orzamentos deste ano que foi capaz de sacar adiante. De feito, esta obra é unha peza central do modelo de cidade do Goberno, máis accesible, cómoda, humana e sostible.

O contrato foi adxudicado por 181.000€ á empresa Sergonsa Servicios SL., que terá un prazo de execución de catro meses. O ascensor de Fontiñas salvará o desnivel de 11 metros existente entre esta ronda e a rúa Ramón Montenegro. O proxecto leva aparelladas ademais distintas actuacións de humanización da zona.

A maiores desta obra, a Alcaldesa, que estivo acompañada polos concelleiros de Infraestruturas Urbanas, Manuel Núñez, Benestar Social, Ana González Abelleira, e Concello e Cidadanía, Rosana Rielo, tamén informou á veciñanza de que vén de ser adxudicada por un importe de 27.500€ a mellora da accesibilidade do entorno do centro de saúde de San Roque, outra actuación amplamente demandada pola cidadanía, que o Goberno incluíu no Plan de Barrios, dotado cun investimento total de 2,5M€.

Así mesmo, neste mesmo plan, o Concello tamén acometerá outra obra de mellora da accesibilidade instalando un pasamáns xunto ao edificio número 129 da Ronda das Fontiñas.

Por outra banda, esta mesma semana concluirán os traballos na rúa Outono que, igualmente con cargo ao Plan de Barrios, mellorarán as condicións de comodidade e seguridade da rúa, cumprindo coas peticións veciñais.

Outra actuación relacionada coa mobilidade que beneficiará ao entorno de Fontiñas é o acondicionamento dun aparcadoiro disuasorio na rúa Xosé Novo Freire, que contará con 28 prazas. Trátase dun dos 7 que o Goberno ten planificado para dotar á cidade de 203 novas prazas, cun importe conxunto de adxudicación de 253.000€. As obras comezarán nun mes e deberán estar rematadas nun prazo de cinco meses, isto é, a principios de ano.

Ademais de explicar os proxectos que o Goberno está executando ou ten previsto a curto prazo no barrio, a Alcaldesa e os concelleiros tomaron nota das peticións da veciñanza, entre elas, o acondicionamento dun parque infantil ou o peche da fonte existente cunha cancela.

Multimedia

  • 130818 Xuntanza veciñal Fontiñas III

Noticias relacionadas