Condutor reincidente localizado grazas a un seguimento de videovixilancia
Efectivos da Policía Local de Lugo, pertencentes á Unidade Territorial de Policía de Barrio, en colaboración coa Unidade de Xestión Tecnolóxica Policial do Corpo, levaron a cabo unha intervención destacada pola detección dun condutor que circulaba co seu vehículo carecendo de permiso de conducir por perda de vixencia por resolución xudicial.
A intervención produciuse cando uns dos indicativos policiais solicitou apoio para confeccionar as dilixencias oportunas na zona norte da cidade. O resultado foi posible grazas a un seguimento discreto e prolongado dos sistemas de videovixilancia, sustentado no labor de control da Unidade de Xestión Tecnolóxica, que permitiu situar os desprazamentos habituais desta persoa.
O condutor, que viaxaba acompañado da súa muller e o seu fillo, foi interceptado e plenamente identificado, procedéndose á instrución de dilixencias por un presunto delito contra a seguridade viaria. A muller, quen manifestou a súa intención de facerse cargo do vehículo tras a intervención, tampouco dispoñía de autorización administrativa para conducir, polo que os axentes impediron que se cometese unha nova infracción. O vehículo foi retirado de forma segura para evitar riscos innecesarios e garantir a legalidade vixente.
Este caso reflicte de forma clara a importancia de contar cun sistema de vixilancia e análise preventivo como o que dispón o Corpo da Policía Local de Lugo, que se converte nun apoio fundamental para reforzar o labor diario dos axentes na vía pública. Unha vez máis, ponse de manifesto que a seguridade de todos os usuarios da vía comeza por identificar e apartar da circulación a condutores que non cumpren cos requisitos legais e poñen en risco a integridade doutras persoas.
Filtros de seguridade viaria
Durante as noites do 11 e 12 de xullo, efectivos do Grupo operativo Nocturno da Policía Local de Lugo, estableceron diversos controis de alcoholemia e drogas en vías do centro urbano, sendo detectado o condutor dun vehículo que lanzou un resultado POSITIVO de 0,95 mg/l (case catro veces máis do permitido), nas probas de alcoholemia ás que foi sometido, instruíndose dilixencias por delito contra a seguridade viaria na modalidade de Xuízo Rápido, inmobilizando o vehículo.
Así mesmo foron interceptados outros tres condutores que lanzaron resultado positivo nas probas de alcoholemia, con valores de 0,30, 0,41 e 0,47 mg/l, respectivamente, abríndose expediente sancionador a cada un deles con multa de 500 euros e a retirada de 4 puntos do permiso de condución, inmobilizándose os vehículos.
No transcurso destes dispositivos realizáronse controis de velocidade con radar, sendo controlados 267 vehículos e denunciados 18 condutores por pasar a velocidade máxima establecida para a vía de 50 km/k, sendo a velocidade máxima captada de 88 km/l, o que supón unha sanción para o condutor de 400 euros e a retirada de 4 puntos do permiso de condución.
Detención por violencia de xénero
Efectivos do Grupo Operativo Nocturno da Policía Local de Lugo procederon á detención dun home de 42 anos de idade, como presunto autor dun delito de violencia de xénero.
Os feitos ocorreron cando unha patrulla policial é comisionada pola Sala do 092 para que se traslade a unha rúa do centro histórico xa que ao parecer unha muller fora agredida polo seu ex parella.
Os axentes trasládanse de inmediato ao devandito lugar sendo recibidos pola muller que lles manifesta que momentos antes cando se dispoñía a entrar nun local de lecer nocturno, a súa ex parella impídelle a entrada, sendo agarrada polos brazos, polo pescozo e polas pernas, conseguindo soltarse e chamar á Policía Local.
Os axentes identifican ao presunto autor destes feitos, manifestando que mantivera unha discusión con esta muller, sendo agredido por ela.
Fronte a esta situación os axentes proceden á detención do home, sendo trasladado a dependencias policiais onde se instrúen dilixencias por estes feitos, sendo conducida a muller a un centro médico para ser asistida das lesións que presentaba.