O Centro Social de Fingoi acolle un curso homologado para o profesorado organizado pola Concellería de Educación, que dirixe Dolores Vieiro, dentro do programa Vivir Xuntos, Convivir. O curso terá lugar o 13, 15, 20, 22, 27 e 29 de novembro e o 3, 4 e 10 de decembro de 17:30 a 20:30 horas.

É unha proposta do Concello de Lugo para ofrecer á comunidade educativa unha serie de recursos orientados á mellora da convivencia en todos os ámbitos da sociedade.

O Mago Rafa actuará mañá, sábado, na parroquia de Recimil dentro dos actos organizados para o Nadal polas distintas parroquias en colaboración co Concello.

Esta actuación foi organizada pola Asociación de Veciños Cruceiro de San Lourenzo, en colaboración co Concello. Está prevista para as seis da tarde no local social.

Os veciños anunciaron que, unha vez rematada a intervención do mago, haberá varias sorpresas para os pequenos que vexan o espectáculo.

O 84,61% dos lucenses que contestaron na enquisa da páxina web www.lugo.es considera que debería existir unha lei que obrigara aos locais a ser accesibles.

Na enquisa participaron un total de 156 persoas, das que 132 están dacordo con esta idea. Por outra banda, un 6,4% (10 persoas) afirma que as leis deberían ocuparse doutras cousas mentres que á mesma porcentaxe lle resulta indiferente. Finalmente, 4 persoas (o 2,56%) afirman non ter unha opinión definida.

A enquisa estivo activa dende o 28 de decembro até onte.

A Asociación Ágora Cultural presenta mañá, xoves, a partir das sete da tarde, o seu primeiro libro de recopilación dos traballos premiados nos certames culturais organizados por este colectivo.

Así, foron tres as categorías nas que se celebraron estes concursos, conto, foto e cómic.