O Servizo Municipal de Prevención de Drogodependencias comeza hoxe unha serie de actividades dirixidas a mozas e mozos do Concello e subvencionadas polo Plan Nacional de Drogas e a venda de obxectos decomisados na loita contra as drogas.

O primeiro destes programas leva por título “E ti, ¿comunicas?” e consiste nunha serie de sesións para promocionar as habilidades sociais. Terán lugar todos os xoves e venres até o 23 de marzo, de catro a sete da tarde. Está dirixido a mozas e mozos de 12 a 20 anos.

O Servizo Municipal de Prevención de Drogodependencias publica hoxe a lista de admitidos no curso de formación de monitores para prevención dende o tempo de lecer que arrincará a fin de semana do 9 e 10 de marzo.

A lista pode consultarse no taboleiro de anuncios de Centro Social Uxío Novoneyra e na páxina web do Servizos de Prevención das Drogodependencias, www.prevenciondrogas.lugo.es.

Debido ao éxito experimentado o ano pasado, formaranse tres grupos con distintos horarios de clases.

A Concellería de Muller e Benestar Social, que dirixe Carmen Basadre, abre mañá, martes, o programa de actos organizado con motivo da conmemoración do Día Internacional das Mulleres.

Trátase de actividades feitas por mulleres pero dirixidas a todo o público “para reivindicar a igualdade entre homes e mulleres, que é a finalidade destas actuacións”. O programa se desenvolverá até o día 13.

O primeiro destes actos, será unha proxección no Centro Social Uxío Novoneyra, ás doce da mañá co título “O traballo invisible das mulleres”.

As actividades de conmemoración do Día Internacional das Mulleres organizados pola Concellería de Muller e Benestar Social deron comezo esta mañá coa proxección do vídeo “O traballo invisible das mulleres”, elaborado en colaboración coa Consellería de Traballo.