Maite Ferreiro: "continuamos a traballar na difusión da danza e das artes do movemento cunha nova colaboración coas escolas lucenses".
As distintas escolas realizarán mostras na rúa entre o 24 de abril e o 4 de maio, e o auditorio municipal acollerá un espectáculo de fusión de distintos estilos o vindeiro 6 de maio.
A concelleira de Cultura, Turismo e Promoción da Lingua, Maite Ferreiro, presentou a segunda edición do festival de danza organizado polas escolas de Lugo "primavera e danza", que conta coa colaboración da Tenencia de Alcaldía do Concello de Lugo a través da área de Cultura. "Renovamos o noso apoio coas escolas de Lugo para continuar a difundir a danza e as súas distintas formas, aproveitando as rúas como un gran escenario para as distintas agrupacións", explicou Maite Ferreiro, que estivo acompañada por integrantes das distintas escolas de danza lucenses na presentación.
O festival celebrarase entre o 24 de abril e o 4 de maio, coas distintas escolas realizando exhibicións no fondo da praza Maior, e rematará o 6 de maio cun un espectáculo de fusión de distintos estilos que terá lugar no Auditorio Municipal Gustavo Freire a partir das 20:00.
Ferreiro afirmou que con esta iniciativa a Tenencia de Alcaldía continúa a apoiar á danza "aumentando a nosa aposta, despois de contar cunha programación estable de danza ao longo de todo o ano".
Datas danza na rúa
- Oxeito, 24 de abril 18:30
- Star Dance, 26 de abril 17:00
- Escola Palimoco de teatro e danza, 27 de abril 13:00
- Gravitty, 27 abril 16:30
- Magie Dance, 28 abril 12.00
- Victoria, 3 maio 18:00
- Mercedes, 4 de maio 19:00