A Casa dos Mosaicos centra a nova conferencia das xornadas de arqueoloxía organizadas polo Concello

Xoves, 22 de marzo de 2018
Fonte: 
Gabinete de Prensa
A Casa dos Mosaicos centra a nova conferencia das xornadas de arqueoloxía organizadas polo Concello

O arqueólogo municipal Enrique González ofreceu este xoves no auditorio do Vello Cárcere unha conferencia sobre a historia e características da Casa dos Mosaicos dentro da programación do ciclo Desenterrar o Pasado. Un Percorrido pola Arqueoloxía de Lugo organizado polo Concello con motivo da conmemoración neste 2018 do Ano Europeo do Patrimonio Cultural. O Concelleiro de Desenvolvemento Sostible e Persoal, Daniel Piñeiro, do que depende o servizo municipal de Arqueoloxía, presentou a ponencia de González sobre o que é un dos conxuntos arqueolóxicos máis completos e mellor conservados da cidade de Lugo.

A relevancia e interese dos restos exhumados na Casa dos Mosaicos deu lugar á decisión de conservalos in situ mediante o seu acondicionamento e posta en valor, para o cal o Concello asinou un convenio coa Xunta, o que permitiu que en decembro de 2005 se abrira ao público este conxunto arqueolóxico. A exhibición dos mosaicos completouse nos anos 2013 e 2015 coa abertura das ventás arqueolóxicas na rúa Doutor Castro, iniciativa acometida con cargo ao plan URBAN.

Enrique González Fernández é licenciado en Xeografía e Historia, especialidade de Prehistoria e Arqueoloxía pola Universidade de Santiago de Compostela, onde realizou tamén os cursos de doutoramento no Departamento de Historia. Na actualidade, desempeña o seu labor profesional como arqueólogo no Servizo Municipal de Arqueoloxía de Lugo. É autor de decenas de textos científicos entre libros, capítulos de libros, artículos de revistas científicas ou de divulgación cultural, e participou en congresos e simposios tanto nacionais como internacionais, ademais de colaborar na organización ou comisariado de varias exposicións arqueolóxicas, e fomar parte do desenvolvemento de numerosos proxectos europeos relacionados co patrimonio cultural (World Heritage:Cultura 2000, Atlante, Vías Atlánticas, Muralla Dixital e Muramiñae –estratexia DUSI-).

Xornadas internacionais de cerámica

As xornadas Desenterrar o Paso. Un Percorrido pola Historia forman parte do programa de actividades organizado polo Concello con motivo da conmemoración neste 2018 do Ano Europeo do Patrimonio Cultural, programación que tamén inclúe as Xornadas Internacionais de Cerámica Antiga no Noroeste Peninsular, coas que a entidade local converterá a Lugo en referente no estudio e difusión desta temática entre os días 25 e 28 de abril no Vello Cárcere. De feito, trátase do primeiro congreso deste entidade e dimensións que se organiza en Galicia sobre cerámica antiga, pois reunirá a 25 expertos de renome a nivel mundial, que ofrecerán 17 conferencias e participarán en mesas redondas e seminarios durante catro días. Haberá ademais visitas guiadas polos museos municipais.

Noticias relacionadas