Os tres proxectos de peonalización do Centro Histórico que se enmarcan na estratexia Corazón Verde continúan avanzando, se ben, nestes días a urbanización das inmediacións do Cuartel de San Fernando obrigará a un pequeno cambio na circulación rodada.

Os escasos vehículos autorizados para acceder ao recinto amurallado – persoas residentes, servizos, parkings soterrados e carga e descarga - terán dúas vías de acceso:

* Matense a anteriormente notificada xa, dende a rúa Montevideo con saída pola rúa Nova, como xa se estaba a facer.

* E mantense tamén a entrada pola rúa do Teatro, atravesando San Marcos, coa ÚNICA VARIACIÓN de que a saída deberá efectuarse por Bolaño Rivadeneira e rúa Nova, en lugar de pola Porta de San Fernando.

Só poderán seguir accedendo á rúa Amor Meilán pola Praza do Ferrol as e os residentes que teñen praza de garaxe na parte superior de Amor Meilán, mentres que o resto o fará pola rúa Nova EXACTAMENTE IGUAL QUE ATA ESTE MOMENTO.

TAMÉN IGUAL QUE ANTERIORMENTE, as persoas que teñan a súa praza de garaxe na rúa San Froilán seguirán accedendo pola rúa Nova como facían nestas últimas semanas.

E as persoas que queiran acceder ao parking soterrado da Praza do Ferrol deberán facelo entrando ao recinto amurallado pola rúa do Teatro.

Estes son os cambios máis significativos que experimenta o Plan de Tráfico das obras que esta mesma mañá entraba en vigor, logo de que os operarios das empresas adxudicatarias das obras remataran a colocación da sinalización pertinente coa que se indicará ás e os condutores cales son as novas indicacións polas que se rexerá o tráfico de vehículos neste punto da capital.

Dende o Goberno local lémbrase que o acceso ao Centro Histórico está restrinxido ao estritamente necesario segundo o establecido, comunicado e sinalizado, con respecto á carga e descarga, residentes e traballadores/as, xunto coa utilización dos aparcadoiros soterrados, tratando de conciliar todos os usos como pode ser o traslado de mercadorías ou a entrada e saída ás vivendas e establecementos e en consonancia xa coa futura implantación da Zona de Baixas Emisións.

Ao tempo que se insta á poboación a actuar con responsabilidade e traer o coche ao Centro Histórico só nos casos nos que resulte inevitable, especialmente pensando no vindeiro venres, día 5 de xaneiro, cando se celebrará a Cabalgata de Reis. Para esta xornada - e pese a que o percorrido da Comitiva se fará pola Rolda da Muralla ata a entrada da rúa Vilalba, por Bispo Aguirra e fondo da Praza Maior - dende o Executivo e a Policía Local se pide á veciñanza unha maior concienciación do uso do coche nestes espazos nos que se agarda unha maior concentración de público.