A alcaldesa de Lugo Paula Alvarellos, acompañada pola edila responsable de Cohesión Territorial, Ana González Abelleira, supervisou esta mañá as tarefas de acondicionamento que se están levando a cabo na contorna do circuíto Jorge Prado de cara a proba do campionato do mundo de motocrós que esta instalación municipal acolle a vindeira fin de semana. Os traballos realizados na dotación inclúen a adecuación do accesos, a instalación da infraestrutura para a xestión de residuos, parte do subministro eléctrico para as tarefas auxiliares e o desbroce de toda a contorna.

“A historia deste circuíto é a historia do noso compromiso co deporte. Cando desde o Goberno local puxemos en marcha esta dotación apostamos decididamente por que Lugo sexa unha cidade referencia, con capacidade para acoller competicións nacionais e internacionais, nunha modalidade deportiva en auxe grazas, en boa medida, aos éxitos logrados polo noso piloto Jorge Prado nos últimos anos. Coa celebración desta proba do campionato do mundo, o noso obxectivo está a cumprirse. Os próximos días a nosa cidade será capital mundial do motocrós coa consecuente dinamización da nosa economía en termos de afluencia turística e consumo asociado a este evento”, sinalou a rexedora.

Alvarellos Fondo, acompañada por persoal da organziación da proba comprobou in situ o avance das tarefas que se executaron nos últimos días no circuito e puxo en valor o estado da instalación municipal. Neste sentido, a alcaldesa agradeceu o traballo dos organizadores e valorou o compromiso do Club Motopark como responsables da xestión do circuíto Jorge Prado por proporcionar un escenario de clase mundial para que os mellores pilotos do mundo demostren as súas habilidades.