O Goberno de Lara Méndez organizará este venres unha xornada para dar a coñecer e poñer en valor os proxectos instalados nos viveiros de empresas municipais. Baixo o título Vive Praza, o evento terá lugar na Praza Maior, en horario continuado de 11:00 a 23:00 horas e contará con actuacións musicais, obradoiros e contacontos.

A alcaldesa apuntou que esta cita “será unha gran oportunidade para visibilizar e promover, dende o corazón de Lugo, unha vintena de proxectos, produtos e servizos de novos emprendedores e emprendedoras lucenses que están a dar os seus primeiros pasos e medrando nas incubadoras empresarais do CEI Nodus e A Tinería”.

A iniciativa enmárcase no movemento Localmente Lucense, promovido polo executivo municipal, a través da área de Desenvolvemento Local e Emprego, que dirixe a edil Ana Abelleira. En concreto, trátase dunha das accións específicas postas en marcha pola alcaldesa para dinamizar os viveiros de empresas municipais, enmarcadas no ‘Plan de fomento do emprendemento e a consolidación empresarial’, que inclúe outras actuacións como os almorzos de negocios, charlas con reputados expertos programas de formación, cine ao aire libre ou xornadas de portas abertas.

Lara Méndez convidou a todos os e as lucenses a participar nesta nova xornada e descubrir “as novas propostas que están a desenvolver os emprendedores e emprendedoras da cidade nun ámbiente festivo e lúdico, pois o evento contará cunha sesión vermú, na que se fomentará o networking, ludoteca para crianzas desde tres anos, un obradoiro infantil relacionado co emprendemento, un contacontos e, como peche final, unha actuación musical”.

Toda a información da xornada, así como as inscricións e bases, poden atoparse na páxina web http://localmentelucense.gal/vivepraza/

Programación

• 11.00 horas. Benvida, explicación da xornada e apertura de postos do mercadiño emprendedor.
• De 11.15 a 23.00 h. Ludoteca infantil (a partir de 3 anos). Con inscrición previa – 20 prazas –
• De 12.00 a 14.00 h. Presentación dos proxectos emprendedores dos viveiros de empresa municipais. Parte I.
• 14.30 h. Sesión vermú emprendedora co DJ Álex Mei.
• De 16.30 h. a 20.30 h. Presentación dos proxectos emprendedores dos viveiros de empresa municipais. Parte II.
• 18.00 h. Contacontos emprendedor para público infantil.
• 19.00 h. Obradoiro infantil, Design Thinking (proceso que se apoia en ferramentas e técnicas que axudan a descubrir os insights necesarios para realizar con éxito un proxecto, axudan a seguir un fío condutor, e potencian a creatividade e a análise.). Con inscrición previa.
• 21.00 h. Entrega de diplomas e obsequios a emprendedores dos viveiros e participantes no taller infantil.
• 21.30 h. Actuación musical de Los Alcántara.