Volven as festas do San Froilán entrando polo outono galego, e agora si, con toda a súa esencia.
Coas barracas que, con esforzo e protocolos sanitarios xa ilusionaron a nenas e nenos o ano pasado, co tradicional desfile de gando que pon en valor o sector primario e cos eventos deportivos que nos enchen de emoción case a diario. Co arrecendo a unha boa ración de polbo das casetas ou da hostalería dos nosos barrios, cos pasarrúas que animan os nosos días ou con música para toda a familia. Coas verbenas para bailar agarrados, o Sanfroidance e a electrónica cos que movernos separados e coas gaitas e muiñeiras para sacar punto aparellados. Volven as patronais lucenses que, sen dúbida, cada ano, son un importante revulsivo económico para a nosa cidade.
Pero sobre todo, volve o San Froilán da xente, o dos reencontros familiares, de amizades e veciñanza, e xa, sen máscaras de por medio.
E é que o San Froilán sodes vós.
O San Froilán sodes as persoas que estes días traballades arreo para que todo saia perfecto (policía, bombeiros, sector hostaleiro, xornalistas, fotógrafos, artesás, feirantes…), as que viaxades para visitarnos e as que vos reunides coa familia e amizades enchendo as prazas e rúas de vida, rindo, cantando, comendo e bailando na cidade máis antiga de Galicia, que, un outono máis, volve abrir as 10 portas da Muralla a toda Galicia e a todo o mundo.
Milleiros de grazas por coidar, xeración tras xeración, do noso patrimonio inmaterial e facernos sentir orgullosos de sermos quen e de onde somos!
Feliz e festivo San Froilán a todas e a todos!
Lara Méndez, Alcaldesa de Lugo
***************************
***************************
Más info
- Felicitación de la alcaldesa de Lugo, Lara Méndez | Descargar jpg
- Programa del San Froilán 2022 | Descargar pdf
